अख्तियारका प्रमुख आयुक्त राईद्वारा पेन्सन नलिने घोषणा

काठमाडौंं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले निवृत्तिभरण(पेन्सन) नलिने घोषणा गरेका छन् । २०७७ माघ २१ मा राष्ट्रपतिबाट प्रमुख आयुक्त पदमा नियुक्त भएका राईले ६ बर्षसम्म पेन्सन नलिने स्वघोषणा गरेका छन् । अख्तियारका लेखाअधिकृत निमलाल भूसालले प्रमुख आयुक्त राईले ‘दोहोरो सुविधा (निवृत्तिभरण) नलिने’ स्वघोषणा गरेकोबारेमा आइतबार निवृत्तिभरण ब्यवस्थापनको कार्यालयलाई पत्र पठाएका छन् ।  

प्रमु्ख आयुक्त राईले फागुनदेखि आयोगबाट सेवा सुविधा पाउने पत्रमा उल्लेख छ । उनले अब प्रमुख आयुक्तको हैसियतमा प्राप्त सेवा सुविधा लिने पत्रमा उल्लेख छ ।

प्रमुख आयुक्त राईको स्वघोषणा प्राप्त हुनासाथ निवृत्तिभरण ब्यवस्थापनको कार्यालयले आइतबार नै उनको पेन्सन रोक्का गरेको जानकारी अख्तियारलाई पठाएका छन् । निवृत्तिभरण ब्यवस्थापनको कार्यालयका शाखा अधिकृत राजभाई श्रेष्ठले लेखेको पत्रमा पेन्सन रोक्का गरिएको उल्लेख छ ।

संवैधानिक निकायमा नियुक्त पदाधिकारीले पेन्सन समेत दोहोरो सुविधा लिने गरेकोमा आलोचना हुँदैआएको छ । तर राईले अख्तियारको प्रमुख हुनासाथ पेन्सन नलिने घोषणा गरी दोहोरो सुविधान नलिनेहरु पनि छन् भन्ने उदाहरण पेश गरेका छन् ।