नेतृत्व हस्तान्तरणका लागि देउवा तयार हुनुपर्छ: डा: सुनिल शर्मा

काठमाडौँ । नेपाली कांग्रेसका नेता डा.सुनिल शर्माले पार्टीभित्रको आन्तरिक विवाद र मतभेदलाई संवादमार्फत टुङ्ग्याउनुपर्ने बताएका छन्।

विशेष महाधिवेशनस्थलमा सञ्चारकर्मीहरूसँग कुरा गर्दै उनले कांग्रेस अहिले गम्भीर संकटको मोडमा रहेको र यसलाई बचाउन संस्थापन पक्षले नेतृत्व हस्तान्तरणका लागि तत्परता देखाउनुपर्नेमा जोड दिएका हुन् ।

५४ प्रतिशत महाधिवेशन प्रतिनिधिले हस्ताक्षर गरेर विधानसम्मत ढङ्गले विशेष महाधिवेशन माग गर्दा पनि केन्द्रीय समितिमा बहुमत छ भन्दै कार्यकर्ताको मनोभावलाई बेवास्ता गरिएको उनले बताए। केही पदाधिकारी र केन्द्रीय सदस्यहरूले कार्यकर्ताको चाहनाविपरीत विशेष महाधिवेशन नबोलाएका कारण आजको परिस्थिति सिर्जना भएको डा. शर्माको ठहर छ।

उनले वर्तमान विषम परिस्थितिमा कांग्रेस र भावी पुस्ताको भविष्य सोचेर पार्टीलाई एकतावद्ध राख्न संस्थापन पक्षले त्याग र अग्रगामी निर्णय लिनुपर्ने बताए। सभापति शेरबहादुर देउवालाई नेतृत्व हस्तान्तरणका लागि तयार रहन आग्रह गर्दै उनले विशेष महाधिवेशन पक्षधरले पनि पार्टीको हित र एकतालाई प्राथमिकतामा राख्नुपर्ने उल्लेख गरे।

पार्टीभित्रका सबै मतभेदहरू संवादबाटै समाधान हुनुपर्ने भन्दै डा। शर्माले सहमति भाँड्ने र उच्छृङ्खल गतिविधिले कांग्रेसलाई थप कमजोर बनाउने चेतावनी दिए।

उनले एकताका नाममा कसैलाई पेल्ने, हेप्ने वा कारबाही गरेर पार्टीलाई विभाजनतर्फ धकेल्ने कार्य स्वीकार्य नहुने स्पष्ट पारे। कांग्रेस संकटमा पर्दा देश नै संकटमा पर्ने भएकाले सबै नेताहरूलाई जिम्मेवार बन्न उनले आग्रह गरे। विवाद समाधानका लागि वार्ता समिति बनेकाले आज मङ्गलबार बेलुकासम्म वार्तालाई निष्कर्षमा पुर्‍याउनुपर्ने उनको माग छ।