अर्जुननरसिंह केसीलाई मेरो प्रयासमा समानुपातिक सूचीमा राखेको होइन : गगन थापा

काठमाडौं । नेपाली कांग्रेसका महामन्त्री गगनकुमार थापाले अर्जुननरसिंह केसीलाई आफूले समानुपातिक सूचीमा नराखिएको प्रष्ट पारेका छन् ।

नेपाली कांग्रेसका नेता अर्जुननरसिंह केसीलाई थापाले समानुपातिकमा राखेको भन्दै मिडियाबाजी भएपछि मंगलबार आफ्नो अनुरोध र हरसम्भव प्रयासबिपरीतको केसीलाई समानुपातिकमा राखिएको बताएका छन् । अर्जुननरसिंह केसी गगन थापाका ससुरा हुन् ।

महामन्त्री थापाले सामाजिक संजालमा लेखेका छन्–‘नेपाली कांग्रेसका नेता अर्जुननरसिंह केसीलाई मेरो प्रयासमा समानुपातिक सूचीमा राखिएको भन्ने हल्ला फैलाइएको रहेछ । म स्पष्ट पार्न चाहन्छु, यो मेरो चाहनाविपरीत हो । मेरो अनुरोध र हरसम्भव प्रयास विपरीतको निर्णय हो ।

मेरा र उहाँका आ–आफ्ना राजनीतिक दृष्टिकोण र निर्णयहरू हुन्छन्, कहिले मिल्छन्, कहिले बाझिन्छन् । जसरी कुनै बेला हाम्रो राजनीतिक दृष्टिकोण र प्राथमिकता मिलेन र एक अर्कासँग पार्टीको महामन्त्री पदका लागि फरक एजेन्डा र सङ्कल्पसहित चुनाव लड्यौं । यसपटक पनि पार्टीका अग्रज नेताले समानुपातिक प्रणाली रोज्ने वा नरोज्ने विषयमा हाम्रो मतभिन्नता रह्यो ।’