मंसिरभित्रै विशेष महाधिवेशन गर्नेकुरा निर्विकल्प जस्तै हो : गगन थापा

काठमाडौं । नेपाली कांग्रेसका महामन्त्री गगनकुमार थापाले मंसिरमा पार्टीको विशेष महाधिवेशन गर्नुको विकल्प नभएको बताएका छन् ।

सानेपामा बसेको केन्द्रीय समिति बैठकपछि सञ्चारकर्मीहरूसँग कुरा गर्दै नियमित अधिवेशनको समय भ्याइनभ्याई भएकाले मंसिर २७–२८ गते विशेष महाधिवेशन गर्नैपर्ने स्पष्ट पारेका हुन् ।

उनले भने– ‘मैले नियमित महाधिवेशन गर्न सकिन्छ भनेर नै कार्यतालिका पेस गरेको हुँ । केही साथीहरू सकिँदैन भन्नुहुन्छ । त्यसका लागि उत्तम बाटो भनेको विशेष महाधिवेशन हो । मंसिरको २७–२८ गते जुन दिन उपयुक्त हुन्छ विशेष महाधिवेशन गर्ने र नयाँ नेतृत्व ल्याउने । विशेष महाधिवेशन नै निर्विकल्प हो ।’

महामन्त्री थापाले कांग्रेस आगामी फागुन २१ गते हुने निर्वाचनमा सहभागी हुने घोषणा गरे । साथै चुनावमा भाग नलिने भनिरहेका दलहरुसँग संवादमार्फत निर्वाचनमा ल्याउने प्रयास कांग्रेसले गर्ने पनि बताए ।

राजनीतिक दलहरूले निर्वाध गतिविधि गर्न पाउनुपर्ने वातावरण बनाउन सरकार गम्भीर नरहेको बताउँदै उनले भने– ‘हातहतियार बाहिर छन्, कैदीहरू फरार छन् । राजनीतिक दलहरूले निर्वाध रूपमा गतिविधि गर्न पाउनुपर्छ ।’

थापाले कांग्रेसले शान्तिको राजनीतिको नेतृत्व गर्नुपर्ने र अहिलेको जटिल अवस्थाबाट निस्कन फागुन २१ को निर्वाचन नै एक मात्र विकल्प भएको दाबी गरे ।

उनले केही दल तथा समूहहरूले उत्तेजना र प्रतिशोध फैलाइरहेको भन्दै त्यसविरुद्ध कांग्रेस दृढतापूर्वक उभिने पनि बताए ।