काठमाडौं । भागरथी भट्टको बलात्कारपछि हत्या भएको घटनामा प्रहरीले एक संकास्पद व्यक्तिलाई पक्राउ गरेको छ ।बैतडीको दोगडाकेदार गाउँपालिकाकी १७ वर्षीया किशोरी भागरथी भट्टको बलात्कारपछि हत्या भएको थियो ।
प्रहरीको केन्द्रीय अनुसन्धान व्यूरो (सीआईबी) समेतको टोलीले गत शनिबार राति कञ्चनपुरको महेनद्रनगरबाट ती व्यक्तिलाई पक्राउ गरेको हो । प्रहरी स्रोतका अनुसार पक्राउ परेका व्यक्ति सार्वजनिक पदमा रहेको र उनलाई अहिले बैतडी ल्याइएको छ।माघमा अपराधस्थल वरपरी देखिएको खुलेपछि उनलाई पक्राउ गरी अनुसन्धान थालिएको छ । खोचलेक बजारमा उनले भागरथीको पिछा गरेको देखिएको प्रहरी स्रोतको दावी छ ।
घटनाको अनुसन्धान गर्ने क्रममा प्रहरीले उनको घरमा भागरथीको मोबाइलको ब्याट्री फेला पारेको खुलेको स्रोतको दाबी छ ।
उनको शरीरको विभिन्न भागमा चिथोरिएको जस्तो चोट देखिएको भएपनि उनले रुखबाट लडेर घाउ भएको प्रहरीसामु वयान दिएका छन् । तर,बलात्कार र हत्याबारे भने उनले अस्विकार गरेको स्रोत वताउँछ।
सुदूरपश्चिम प्रदेश प्रहरी कार्यालयका प्रमुख डिआईजी उत्तम सुबेदीले प्रहरी अनुसन्धान अन्तिम चरणमा पुगेको र अभियुक्त चाँडै नै सार्वजनिक गर्ने दाबी गरेका छन् ।
पक्राउ परेका व्यक्तिले विगतमा पनि महिलाहरुमाथि दुर्व्यवहारजन्य गतिविधि गर्ने प्रयास गरेको पाइएको अनुसन्धानबाट खुलेको छ ।भागरथी हत्या प्रकरणपछि भने उनी भारततिर भाग्न खोजेको प्रहरीको आशंका छ ।
