निर्वाचनले मात्र संविधानलाई सही मार्गमा ल्याउँछ : गगन थापा

काठमाडौैं । नेपाली कांग्रेसका महामन्त्री गगनकुमार थापाले संविधानलाई सही मार्गमा ल्याउने एकमात्र बाटो निर्वाचन नै भएको बताएका छन् । फागुन २१ गतेको निर्वाचनबाटै नयाँ संसद आउने र संविधानलाई सही मार्गमा ल्याउने यही एकमात्र बाटो भएको र यसमा अलमल नभएको उल्लेख गरेका छन् ।

महामन्त्री थापाले निर्वाचनअघि कांग्रेसको अधिवेशन गर्नुपर्ने कुरामा जोड दिंदै अधिवेशनबाट आउने नेपाली कांग्रेसको नीति र नेतृत्वले मात्र हामीलाई निर्वाचन लड्न योग्य बनाउँछ भन्ने हाम्रो अडान भएको उल्लेख गरेका छन् ।

प्रतिनिधिसभा पुनस्र्थापना गर्ने पक्षमा नेपाली कांग्रेसका सांसदहरुले हस्ताक्षर गर्न थालेपछि महामन्त्री थापाले देशलाई सही बाटोमा ल्याउने निर्वाचनमात्र भएको प्रष्ट पार्दै उनले सोमबार बिहान सामाजिक संजालमा लेखेका छन्–‘फागुन २१ गतेको निर्वाचनबाटै नयाँ संसद आउनेछ । संविधानलाई सही मार्गमा ल्याउने यही एकमात्र बाटो हो, यसमा कुनै अलमल छैन ।

नेपाली कांग्रेस पार्टीको तर्फबाट प्रधानमन्त्रीको उपस्थितिमा सम्पन्न सर्वदलीय बैठकमा पार्टीको यो निर्णय स्पष्टरूपमा प्रस्तुत गरिसकेका छौँ । नेपाली कांग्रेस केन्द्रीय कार्यसम्पादन समितिको पनि यही निर्णय हो ।

नेपाली कांग्रेसको केन्द्रीय कार्यसमितिमा अहिले भइरहेको अलमल यो विषयका सन्दर्भमा होइन । यस सन्दर्भमा हामी स्पष्ट छौँ ।

निर्वाचनअघि अधिवेशन गर्नुपर्छ, किनकि अधिवेशनबाट आउने नेपाली कांग्रेसको नीति र नेतृत्वले मात्र हामीलाई निर्वाचन लड्न योग्य बनाउँछ भन्ने हाम्रो अडान हो ।

अहिलेको छलफल र अलमल यही विषयमा मात्र हो, फागुन २१ गतेको निर्वाचनका बारेमा होइन ।

नेपाली कांग्रेसले फागुन २१ गतेको निर्वाचनमा भाग लिन्छ मात्र होइन, यसलाई सफल पनि बनाउँछ । यसमा कसैले पनि द्विविधा नराखौँ ।