प्रधानन्यायाधीश र अख्तियार प्रमुखविरुद्ध आफैं मैदानमा, सुशीलाविरुद्ध टिम परिचालन

काठमाडौं । ‘जेनजी’ आन्दोलनपछि नेपाल समाजवादी पार्टी (नयाँशक्ति) पार्टीका अध्यक्ष परित्याग गरेका डा. बाबुराम भट्टराईका सचिवालयका नेताहरुले पछिल्लो समयमा प्रधानमन्त्री सुशीला कार्की, प्रधानन्यायाधीश प्रकाशमानसिंह राउत र अख्तियार प्रमुखआयुक्त प्रेमकुमार राईविरुद्ध शृंखलाबद्ध अभियान चलाएका छन् ।

बुटवल घर भएका डा. बाबुराम भट्टराईका प्रेस तथा आईटी विभागका प्रमुख इन्जिनियर अमित खनालले यसको समन्वय गरिरहेका छन् । खनाल मेकाट्रोनिक्स इन्जिनियर हुन् । खनाल प्रोग्रामिङ, सर्किट डिजाइनिङ र सिस्टम डिजाइनमा गहिरो ज्ञान राख्छन् । उनी नेपाल समाजवादी पार्टी (नयाँशक्ति)का केन्द्रीय सदस्य पनि हुन् ।

जेन–जी एलायन्सको नाममा खनालकै समन्वयमा अख्तियारका प्रमुख आयुक्त प्रेमकुमार राईले राजीनामा दिनुपर्ने माग बोकेर अख्तियार दुरुपयोग अनुसन्धान आयोगको कार्यालय पुगेका थिए ।

स्रोतका अनुसार उनकै समन्वयमा २१ असोजमा रिजन रानामगर, पेमा वाङ्मो लामा र मोनिका लगायत अख्तियारको कार्यालय पुगेका थिए । खनालले नै प्रधानन्यायाधीश प्रकाशमानसिंह राउतको राजीनामाको अजेन्डा तयार पारेर टोली परिचालन गरेका छन् । अख्तियार पुगेका यी चारमध्येका एकले भने, ‘प्रधानन्यायाधीश प्रकाशमानसिंह राउत र अख्तियार प्रमुख आयुक्त प्रेमकुमार राई लगायको राजीनामा किन ? भन्ने बिषयमा उहाँले नै बुझाउनु भएको हो ।’

गएको ११ फागुन २०८१ देखि उनले बाबुरामको सचिवालय सम्हालिरहेका छन् । इन्जिनियर खनाललाई आफ्नो सचिवालयमा नियुक्त गरेको जानकारी दिँदै डा. भट्टराईले नाति पुस्तासँगको सहकार्य वैकल्पिक राजनीतिक अभियानलाई सार्थक परिणाममा पुर्‍याउन सहयोगी हुने अपेक्षा गरेको बताएका थिए ।

‘युवा मेकाट्रोनिक्स इन्जिनियर तथा डिजिटल क्रियटर अमित खनाललाई आफ्नो निजी सचिवालयमा प्रेस तथा आईटी विभाग हेर्नेगरी नियुक्ति गर्न पाउँदा खुशी छु’, डा. भट्टराईले सामाजिक सञ्जालमा लेखेका थिए, ‘नाति पुस्तासँगको सहकार्य वैकल्पिक राजनीतिक अभियानलाई सार्थक परिणाममा पुर्‍याउन सहयोगी हुने अपेक्षा गरेको छु । सबैको सद्भाव र सहयोगका लागिहार्दिक आग्रह गर्दछु ।’

संशयपूर्ण भूमिका

‘जेनजी’आन्दोलनकै कारण सुीशला कार्की प्रधानमन्त्री बनेकी हुन् । तर खनालले आफ्नो समूहमा सुशीला कार्की र ओमप्रकाश अर्यालले ‘जेनजी’ आन्दोलनको भावना बुझ्न नसकेको भन्दै सुशीलाविरुद्ध समेत एउटा टोलीलाई अभियानमा खटाएका छन् । जेनजी आन्दोलनको अजेन्डा सम्बोधनका लागि तेश्रो व्यक्तिलाई कार्यकारी राष्ट्रपति बनाउनुपर्ने उनले तर्क सुरु गरेका छन् । उनकै अभियानका एक सदस्यले आफ्नो मोबाइलमा रहेको रेकर्ड सुनाएर भने, ‘अब तेश्रो व्यक्तिको खोजी गर्नुपर्छ भन्नुभएको छ, त्यो पात्र को हो ? त्यो खुलाउनुभएको छैन ।’

डा. बाबुराम भट्टराई वा कुनै एक पूर्व प्रधानन्यायाधीशलाई कार्यकारी राष्ट्रपति बनाउनुपर्ने तर्कमा छन् । भ्रष्टाचार र सुशासनका अजेन्डा उठाएर आन्दोलन गरिए पनि खनालले भने संसदीय समितिले १२ अर्ब भ्रष्टाचारको गरेका दाबी गरेका नागरिक उड्ययन प्राधिकरणका महानिर्देशक प्रदीप अधिकारी, साहिल अग्रवाल, विचौलियाको आरोप लागेका दिपक भट्टसँग दैनिक रुपमा भेट गरिरहेको स्रोतको दाबी छ । उनी अर्घाखाँची ढाकावाङका कमला खनाल र कृष्णप्रसाद खनालका छोरा हुन् ।