फेसबुकमा गृहमन्त्रीको रहर गर्ने प्रहरीका पूर्वहाकिमहरूलाई प्रधानमन्त्रीले किन पत्याइनन् ?

काठमाडौं । प्रधानमन्त्री सुशीला कार्कीले आइतबार राति तीन मन्त्री नियुक्त गरेकी छन् । कार्की मन्त्रीपरिषदमा रामेश्वर खनाल, कुलमान घिसिङ र ओमप्रकाश अर्याल मन्त्री नियुक्त भएका छन् ।

खनालले अर्थमन्त्रीको जिम्मा पाएका छन् । कुलमानले उर्जा, जलस्रोत तथा सिंचाई मन्त्रालय, सहरी विकास र भौतिक पूर्वाधारसमेत तीन वटा ठूला बिकासे मन्त्रालयको जिम्मेवारी पाएका छन् ।

त्यसैगरी, ओमप्रकाश अर्यालले कानुनसहित गृहमन्त्रालयको जिम्मा पाएका छन् । प्रधानमन्त्री कार्कीले मन्त्रिपरिषद बिस्तार नगरेसम्म शनिबारदेखि नै प्रहरीबाट अवकाश पाएका पूर्वआईजीपी र एआईजीहरुले गृहमन्त्री हुन लागेको हल्ला सामाजिक संजालमा ब्यापक चलाए ।

स्वार्थ बाझिने(कन्फ्ल्क्टि अफ इन्ट्रेष्ट) हुने भएकाले पनि प्रहरीका उच्च अधिकारीलाई गृहमन्त्री बनाउने संभावना नहुँदा नहुँदा पनि खनाल, खरेल र पोखरेलले सामाजिक संजालमा प्रचारमा उत्रिएका थिए ।

तस्करीदेखि गुण्डागर्दी नियन्त्रण गर्ने सिंघमका रुपमा चिनाउने तर श्रीमतीका नाममा सुराकी भत्ता लिने र मिटरब्याजमा पैसा लगाउनेहरु पनि गृहमन्त्री हुन लागेको हल्ला चलाएका थिए । सांसद अपहरणमा मुछिएकाहरु पनि गृहमन्त्री आफू नै हुने समाचार समेत आफ्नानिकट पत्रकारहरुलाई लेखाउन तल्लीन भएर लागेका थिए ।

पूर्वप्रधानन्यायाधीश चोलेन्द्रशमशेर राणा र उनका भाइ प्रभुलाई खुसी पारी प्रहरीमा डीआईजी र एआर्ईजीमा आफ्ना ब्याचीलाई उछिनेर जम्प हानी आईजीपीको दौडमा लागेका तर हुन नसकेकाहरु पनि गृहमन्त्री हुने भन्दै दौडधूपमा लागेका थिए ।

फेसबुकमा सबैभन्दा पहिला गृहमन्त्रीको हल्ला चलाउनेमा पूर्वआईजीपी सर्वेन्द्र खनाल हुन् । खनाल काठमाडौं क्षेत्र नम्बर ६ मा एमालेबाट गएको निर्वाचनमा उम्मेदवार भई राष्ट्रिय स्वतन्त्र पार्टीका शिशिर खनालसँग आधा मतले पराजीत भएका थिए । रामचन्द्र पौडेल राष्ट्रपति भएपछि रिक्त भएको तनहुँ १ मा पनि उनी भारी मतले तेस्रो भएर पराजित भएका पात्र हुन् । उनले केही समयअघि एमाले छाडेका थिए ।

गृहमन्त्री हुनेमा खनालकै ब्याची पूर्वडीआईजी रमेश खरेल पनि हुन् । उनले गृहमन्त्री हुनै लागेको भनेर फेसबुकमा खुब हल्ला चलाए । खरेल रामसहायप्रसाद यादव उपराष्ट्रपति भएपछि बारा २ मा रास्वपाबाट उम्मेदवार भई जमानात समेत जोगाउन नसकी पराजीत भएका पात्र हुन् ।

आफू १७ महिना सिनियर भए पनि आईजीपी नियुक्ति गर्दा कांगेस सभापति शेरबहादुर देउवा र एमाले अध्यक्ष केपी शर्मा ओलीले अन्याय गरी जुनियरलाई बनाएको भन्दै पूर्वएआईजी विश्वराज पोखरेल पनि गृहमन्त्री हुने दौडमा दौडधूपमा लागेका थिए ।

एआईजीबाट अवकाश पाएकी मिरा चौधरीको नाम पनि गृहमन्त्रीमा उछालिएको थियो । तर प्रधानमन्त्री कार्कीले अर्याललाई गृहमन्त्री नियुक्त गरेपछि आइतबार रातिबाट फेसबुकमा गृहमन्त्रीको दाबी गर्नेहरु जिल्लाराम भएका छन् ।