पूर्वआईजीपी सर्वेन्द्र खनालको चुनाव प्रचारमा सादा पोशाकका प्रहरी (भिडियोसहित)

पथलैया । झापा क्षेत्र नम्बर ५ मा राष्ट्रिय स्वतन्त्र पार्टीका उम्मेदवार बालेन्द्र साह(बालेन)को चुनाव प्रचारमा सादा पोशाकका प्रहरी परिचालन गरिएकोबारेमा चर्को बिरोध भइरहेको छ ।

बालेनकी श्रीमती सबिना काफ्लेसँग सादा पोशाकका प्रहरी चुनाव प्रचारमा मागेर लगेकोबारेमा निर्वाचन आयोगले रास्वपासँग स्पष्टीकरणसमेत सोधेको छ । तर चुनाव प्रचारमा सादा पोशाकका प्रहरी अन्यत्र पनि खटिएको पाइएको छ ।

मधेश प्रदेशको बारा क्षेत्र नं. ४ का प्रतिनिधिसभाका उम्मेदवार सर्वेन्द्र खनालले चुनाव प्रचारमा प्रहरीलाई समेत लगेको भिडियो नै नेपालफेसलाई प्राप्त भएको छ । खनालले एक भेलामा मैथली भाषामा मतदाताहरुलाई सम्बोधन गरिरहेको कार्यक्रममा उनीसँगै सादा पोशाकमा खटिएका नेपाल प्रहरीका  असई र बरिष्ठ हवल्दारसमेत देखिएका छन् ।

नेपाल प्रहरीका पूर्व आईजीपीसमेत रहेका खनालले नेपाल प्रहरीका असई मनोज यादवलाई बारा ४ का गाउँ गाउँमा आफूसँगै लिएर चुनाव प्रचार गरिरहेको आरोप छ । असई यादवसहित सहभागी भएको कार्यक्रमको भिडियो नै प्राप्त भएकाले सादा पोशाकका प्रहरी खनालले चुनाव प्रचारमा लगाएको पुष्टि भएको छ ।

यादव विवादित असई हुन् । सर्लाहीका बिभिन्न नाकाको इन्चार्ज हुँदा पटक–पटक घुसकाण्डमा परी निलम्बनमा परेका यादव केही दिनयता पूर्व आईजीपी खनालको चुनाव प्रचारमा खटिएका छन् ।

असई मनोज यादवसँगै बरिष्ठ हवल्दार सुुरेन्द्र चौधरी समेत खनालको चुनाव प्रचारमा सक्रिय रहेका छन् । भिडियोमा उनीसमेत देखिन्छन् ।

यादवसहित ५० जना बिभिन्न दर्जाका सादा पोशाकका घुमुवा प्रहरीलाई २०८२ माघ ४ गते गणहरुमा तानिएको थियो । तर उनी २० दिनदेखि पूर्वआईजीपी खनालको चुनाव प्रचारमा त खटिएकै छन् । साथमा प्रहरी मुख्यालयको सचिवालयबाट मधेश प्रदेशमा घुमुवाका रुपमा खटिएको हुँ भन्दै ब्यापारीदेखि बिभिन्न कारोबारीसँग असुलीसमेत गर्दैआएको आरोप उनीमाथि लागेको छ ।

घुमुवाका रुपमा असुलीमा विवादमा परेर कारबाहीस्वरुप तानिएका असई यादव फेरि आईजीपी सचिवालयबाटै प्रदेशको घुमुवाका रुपमा कसरी खटिएका हुन् भन्ने प्रश्न पनि उठेको छ । वर्तमान आईजीपी दानहादुर कार्की सर्वेन्द्र खनाल आईजीपी हुँदा उनका पीए थिए । त्यही भएकाले खनाललाई चुनाव जिताउन सादा पोशाकका असई यादवलाई खटाएका त होइनन् भन्ने आशंका पनि कतिपयले गरेका छन् ।

समुन्नत पार्टी दर्ता गरी त्यसको अध्यक्ष भएका पूर्वआईजीपी खनाल बारा ४ मा प्रतिनिधिसभा निर्वाचनमा उम्मेदवार छन् । उनी रास्वपामा प्रवेश गरी उम्मेदवार हुन खोजेका थिए ।

त्रिकोण बिज्ञापन एजेन्सीका मालिक राजेन्द्र अर्यालमार्फत् रास्वपा अध्यक्ष रबि लामिछानेले नामै सुन्न नचाहेपछि उनले समुन्नत पार्टी खोलेर बारा ४ मा उम्मेदवारी दिएका छन् । बारा ४ मा एमालेबाट कृष्णकुमार श्रेष्ठ(किसान) र रास्वपाबाट रहबर अन्सारी उम्मेदवार छन् ।

हेर्नुहोस् भिडियो, जहाँ असई मनोज यादव खनालसँगै प्रचारमा (निलो एरोले देखाइएका)