खोटाङ, १२ बैशाख । दिक्तेलबजारका आज एक घरमा आगलागी भएको छ । दिक्तेल रुपाकोट मझुवागढी नगरपालिका–१ दिक्तेल पोखरीका सिद्धिबहादुर सैंजूको घरमा आगलागी भएको हो ।
आगलागीबाट जस्ताको छाना भएको दुई तले घरमा आगजनी हुँदा अन्दाजी ७ लाखको क्षति भएको जिल्ला प्रहरी कार्यालय खोटाङका प्रमुख बामदेव गौतमले बताए ।
बजारबीचमा लागेको आगो प्रहरी, स्थानीयबासी र नगरपालिकाको दमकल प्रयोग गरेर नियन्त्रणमा लिएकाले घर पूर्णरुपमा जल्नबाट जोगिएको छ । विद्युत सर्ट हुँदा सैंजूको घरमा आगलागी भएको अनुमान गरिएको छ । लकडाउनका कारण भीडभाड गर्न नहुने भए पनि आगलागीले विपत्ती निम्तिएपछि स्थानीय जोखिम मोलेर सहयोग तथा उद्धारका कार्यमा निस्किएका थिए ।
आगोले छिमेकी लक्ष्मीकुमार सैंजूको घरमा पनि क्षति पुगेको छ । बेलैमा आगो नियन्त्रणमा आएका कारण अन्य बजारका घर आगलागीबाट जोगिएको छ ।
