एमालेमा पूर्वराष्ट्रपतिको पक्षमा बोल्नेमाथि शृंखलाबद्ध कारबाही, निशानामा खेलकुद महासंघका तीन नेता

काठमाडौं । पूर्वराष्ट्रपति विद्यादेवी भण्डारीको पक्षमा लाग्नेहरुलाई एमालेले एकपछि अर्को कारबाही गर्ने शृंखला रोकिएको छैन ।

भण्डारीको पक्षमा अभिब्यक्ति दिनेमात्र होइन, सामाजिक संजालमा लेख्नेहरुलाई समेत एमालेको संस्थापन पक्षले स्पष्टीकरण सोध्ने, निलम्बन गर्ने र निस्कासन गर्ने अभियान सुरु गरेको छ ।

युवासंघ लुम्बिनी प्रदेश अध्यक्ष सुजन खरेल युवासंघकी केन्द्रीय सदस्य युवन्तिका राईलाई भण्डारीको पक्षमा अभिब्यक्ति दिएबापत निलम्बन गरेको एमालेले शु क्रबार मात्रै पार्टीनिकट खेलकुद महासंघका तीन जना नेतालाई स्पष्टीकरण सोधेको छ ।

महासंघका केन्द्रीय सदस्यत्रय कमलमणि गौतम, हरि बर्तौला र हरिबंश कडरियालाई स्पष्टीकरण सोधिएको छ । एमालेनिकट खेलकुद महासंघका अध्यक्ष परशुराम बस्नेत र धर्म लामाले पार्टी नेतृत्वलाई खुसी पार्नका लागि पूर्वराष्ट्रपति भण्डारीको पक्षमा अभिब्यक्ति दिने उनीहरुलाई स्पष्टीकरण सोधिएको हो ।

संखुवासभाका गौतम महेन्द्ररत्न क्याम्पस ताहचलका इकाई सभापति, अनेरास्ववियु बागमती अन्चलका सचिव, अनेरास्वबियु केन्द्रीय सदस्य हुँदै पुरुषोत्तम पौडेल खेलकुद महासंघको अध्यक्ष हुँदा सचिव थिए । पौडेल नेतृत्वको खेलकुद महासंघ गाभिएपछि उनी महासंघको केन्द्रीय सदस्य र कोशी प्रदेश इन्चार्जसमेत छन् । बर्तौला सर्लाही–काठमाडौं सम्पर्क मञ्चको २ कार्यकाल सचिव भएका थिए । प्रष्ट बोल्ने स्वभावका बर्तौलालाई मञ्चको कोषाध्यक्ष हुनसमेत बन्चित गरियो ।

युवासंघको स्थायी कमिटी सदस्य भएका बर्तौलाले एमालेमा धेरै रगत पसिना बगाएका छन् । तर विवादास्पद विगत भएका खेलकुद महासंघका अध्यक्ष परशुराम बस्नेतले गौतम, बर्तौला र कडरियालाई स्पष्टीकरण सोधेर नेतृत्वको चाकडी गरेका छन् । आफैं विगतमा गुण्डागर्दीमा जेल परेका परशुरामले महासंघका तीन केन्द्रीय सदस्यलाई सामाजिक सञ्जालमा पार्टीबारे अराजक र अनुशासनहीन अभिव्यक्ति दिएको आरोप लगाएर स्पष्टीकरण सोधेका छन् ।

बस्नेत र लामाले निषेधको शृंखला अहिलेमात्र होइन, विगतमा पनि गर्दैआएका थिए । उनीहरुले यसअघि नेपाल बेसबल संघका अध्यक्ष दीपक न्यौपानेलाई खेलकुद महासंघको उपमहासचिवमा निर्बिरोध हुने भएपछि उक्त पद नै खारेज गरेका थिए ।

महासंघले स्पष्टीकरण सोधेका गौतमले त पूर्वराष्ट्रपति भण्डारीसँग आइतबार नै भेटेर तस्वीरसमेत सामाजिक संजालमा सेयर गर्दै लेखेका छन्– सत्यसग नचुक्नुु ! झारपातसग नझुक्नु !! भन्ने निर्देशन प्राप्त भयो कमरेडबाट !!

यस्तो छ स्पष्टीकरण