पूर्व सूचना तथा सञ्चार राज्यमन्त्रीले यौनशोषण गरेको अदालतको ठहर

काठमाडौं ।नेपाली काँग्रेसका नेता एवम् पूर्व सूचना तथा सञ्चार राज्यमन्त्री गोविन्दबहादुर शाहले घरमा श्रीमती हुँदाहुँदै आफ्नै कार्यकर्तासँग विवाहको नाटक गरि कान्छी श्रीमती बनाएको उच्च अदालत दिपायलले रहेको ठहर गरिदिएको छ । शाहले विवाह गरेपनि औपचारिक रूपमा नस्वीकारेको र आफूलाई अलपत्र पार्दै श्रीमतीको अधिकारबाटसमेत बञ्चित गराएको दावीसहित नेपाल महिला संघकी नेतृ राधिका भुजेलले दायर गरेको मुद्दामाथि उच्च अदालतको मंसिर २१ गतेको फैसला आएको हो । अदालतले उनीहरुबीच श्रीमान श्रीमतीको नाता कायम गरिदिएको छ ।

पिडित श्रीमती भुजेलले नाता कायम गराई पाउन यसअघि जिल्ला अदालत अछाममा मुद्दा हालेकी थिइन् । तर,जिल्लाले श्रीमान श्रीमतीको नाता कायम नहुने ठहर्याएपछि उनी उच्च अदालत,दिपायल पुगिन् । जिल्लाको फैसला उल्ट्याउँदै उच्च अदालतले शाह र भुजेलबीच श्रीमान र श्रीमतीको नाता कायम गरिदिएको छ । राधिकाले अदालतमा दिएको फिराददावीमा “२०६० मंसिर १२ गते आफूलाई काठमाडौँ जाने भनी फकाएर मनकामना मन्दिर पुर्याएको र तीन दिनपछि १५ गते शाहले सिउँदोमा सिन्दुर हालेको’ उल्लेख छ ।

सिन्दुर हाल्नुअघि र हालेपछिको केही समयसम्म राम्रै रहेको उनीहरूको सम्बन्ध विवाह दर्ताको विषय उठेपछि बिग्रिएको बताइन्छ । राधिकाले अछामस्थित पुख्र्यौली घरमा आफूलाई भित्र्याउन अनुनय विनय गर्दा पनि शाहले जातीय कारण,घरमा जेठी श्रीमती र दुईजना बालबच्चालाई देखाउँदै आलटाल गर्दै आएका थिए । त्यसपछि राधिकाले विवाह दर्ता मागेको निहुँमा २०७५ असार १२ गते शाहले कुटपिट गरेपछि बहुविवाहको मुद्दा जिल्ला हुँदै उच्च अदालतसम्म पुगेको थियो ।