एकीकृत समाजवादीको सचिवालय बैठक, पतञ्जली र रामकुमारी झाँक्रीबारे छलफल हुने

काठमाडौं । नेकपा(एकीकृत समाजवादी) को सचिवालय बैठक बस्दैछ । बैठक पार्टी केन्द्रीय कार्यालय (आलोकनगर) मा बिहीबार बिहान ११ बजे बस्नेगरी बोलाइएको छ ।

बैठकमा अध्यक्ष माधव नेपाललाई लागेको भ्रष्टाचार मुद्दा (पतञ्जली जग्गा प्रकरण) सहित समसामयिक राजनीतिक विषयमा छलफल हुने बताइएको छ ।

यसैगरी अध्यक्ष नेपालविरुद्ध स्थायी कमिटी सदस्य रामकुमारी झाँक्रीले दिएको अभिव्यक्तिबारे पनि बैठक छलफल हुनेछ ।

झाँक्री केही दिनअघि लुम्बिनीमा अध्यक्ष फेर्नुपर्ने तथा ‘मरेको सिनो काँधमा बोकेर हिँड्न सकिँदैन’ भनेकी थिइन् । त्यसपछि मंगलबार पार्टी अनुशासन आयोगले झाँक्रीलाई तीन दिने स्पष्टीकरण मागेको थियो । महाधिवेशनमा पार्टीको पदाधिकारीमा हारेपछि झाँक्री एकपछि अर्को पार्टीबिरोधी अभिब्यक्ति दिंदैआएकी छन् ।