कुलिङ पिरियडमा गडबड गर्नेमाथि कारबाही गरियोस् : डा. शेखर कोइराला

काठमाडौं । प्रतिनिधिसभाबाट पारित भएको संघीय निजामती सेवा ऐनमा राखिएको कुलिङ पिरियडमा अनधिकृत रुपमा परिवर्तन गरिएकोमा सर्वत्र आलोचना सुरु भएको छ ।

नेपाली कांग्रेसका नेता डा. शेखर कोइरालाले सर्वसम्मतिबाट पारित भएको निजामती सेवा ऐनमा अनधिकृत परिवर्तन गर्नु देश र जनताप्रति गरिएको घोर अपराध र सार्वभौम संसदप्रति गरिएको अपमान भएको बताएका छन् ।

कुलिङ पिरियड हटाउने प्रकरणमा जोडिएकाहरुलाई हदैसम्मको कारबाही गर्नसमेत उनले माग गरेका छन् । राज्यब्यवस्था समितिकै सभापति रामहरि खतिवडाले नै अन्तिम मस्यौदामा कुलिङ पिरियडको प्रावधानमा परिवर्तन गरी राजदूत र संवैधानिक निकायसहित सरकारी निकायमा बाहेक कुलिङ पिरियड लागू हुने ब्यवस्था राखेको आरोप छ । डा. कोइरालाले समेत राज्यब्यवस्था समितिका सभापतितर्फ संकेत गर्दै कारबाहीको माग गरेका छन् ।

सामाजिक संजालमा उनले लेखेका छन्–‘संसदमा पेस भएको निजामती सेवा विधेयक अनधिकृत रुपमा परिवर्तन गरिनु, गराइनु कुनै सामान्य घटना नभई, देश र जनताप्रति गरिएको घोर अपराध र सार्वभौम संसदप्रति गरिएको अपमान हो ।’

यस प्रकरणमा जोडिएकालाई तुरुन्त हदैसम्मको कारवाही अगाडि बढाई, परिवर्तन गरिएको व्यवस्थालाई आजै पुरानै अवस्थामा लैजाउँ ।
कुलिङ पिरियड नराखी यस विधेयकका अगाडिका काम कारवाही अगाडि बढ्नु हुँदैन र बढ्दैन ।