काठमाडौं । महानगरीय प्रहरी परिसर काठमाडौँले प्रेमिकालाई गोली हानेर हत्या गरी फरार रहेका एक जनालाई पक्राउ गरेकाे छ । पक्राउ पर्नेमा ताप्लेजुङको छाँगे–१ घर भएका कुमुकहाङ लिम्बु आङबुहाङ छन् ।
महानगरीय प्रहरी परिसर काठमाडौँका एसएसपी अशोक सिंहका अनुसार हत्या आरोपीलाई गएराति मुलपानीबाट पक्राउ गरिएकाे हाे । पाँचथरमा प्रेमिकालाई गोली हानेर हत्या गरेपछि २०६७ देखी फरार रहेका प्रहरीले जनाएकाे छ ।
२०६७ मा पाँचथरको एक होटलमा कुमुकहाङले सामान्य विवाद हुँदा प्रेमिकालाई गोली हानेका थिए । टाउकोमा गोली लागेर प्रेमिका ढलेपछि भागेका उनी काठमाडौँमा लुकिछिपी बसेको प्रहरीको अनुसन्धानबाट खुलेकाे थियाे ।
लाहुरेको छनोट परीक्षामा सहभागी भएर ताप्लेजुङ फर्कंदा कुमुकहाङ प्रेमिकासँग पाँचथर स्थित एक होटलमा बसेका थिए । हत्या आरोपीलाई मुलपानीबाट पक्राउ गरेर पाँचथर पठाउन लागिएको महानगरीय प्रहरी परिसर काठमाडौँले जनाएकाे छ ।
