चोरी र डाँका मुद्दामा छुटेका व्यक्तिबाटै ठगिए सशस्त्रका सात प्रहरी …

काठमाडौं  । सशस्त्र प्रहरी बलका प्रहरीहरू नै ठगीमा परेका छन्। सिन्धुपाल्चोक चौतारा साँगाचोकगढी नगरपालिका-२ बतासेका दिनेश सापकोटाले सशस्त्र प्रहरी बलमा कार्यरत् प्रहरीहरूलाई ठगेका हुन् ।

सशस्त्र प्रहरी बलको एफपियु (फर्म्ड पुलिस युनिट) मिसनमा पठाइदिने बहानामा सात जनालाई ठगी गरेपछि सापकोटा पक्राउ परेका छन् ।

सापकोटालाई दक्षिणकाली नगरपालिका-५ फर्पिङबाट आइतबार पक्राउ गरिएको काठमाडौं उपत्यका अपराध अनुसन्धान कार्यालयले जनाएको छ ।

२७ वर्षीय सापकोटा भक्तपुर चाँगुनारायण नगरपालिका-२ दुवाकोट बस्दै आएका थिए ।

सापकोटाले सशस्त्र प्रहरीका ती कर्मचारीसँग रकम लिएको खुलेको कार्यालयका प्रवक्ता प्रहरी उपरीक्षक काजीकुमार आचार्यले बताए ।

तर, सात जना प्रहरीबाट सापकोटाले के कति रकम लिएको भन्नेबारे स्पष्ट हुन बाँकी रहेको आचार्यले बताए ।

सापकोटा विगतमा चोरी तथा डाँका सम्बन्धी कसुर, बैंकिङ कसुर, ठगी तथा आपराधिक विश्वासघात तथा आपराधिक लाभलगायत कसुरमा पक्राउ परेर छुटेका व्यक्ति रहेको अभिलेख प्रहरीसँग छ ।

सापकोटालाई तथ अनुसन्धान तथा कारबाहीको लागि जिल्ला प्रहरी परिसर भद्रकाली पठाइएको छ ।