प्रचण्ड-नेपाल समूहले महासचिवकाे टुंगाे लगाउन सकेन

काठमाडाैं । नेकपाको प्रचण्ड-माधव समूहले आज महासचिवको टुंगो लगाएकाे छैन् । स्राेतका अनुसार महासचिवका आकांक्षी धेरैजना भएपछि निर्णय लिन सकस परेकाे हाे ।

नेकपा वरिष्ठ नेता झलनाथ खनालको प्रस्तावमा सुरेन्द्र पाण्डेलाई महासचिव बनाउने सहमति बनेकाे थियाे । तर अन्तिममा कुरो मिल्न नसकेको बताइएकाे छ।

महासचिवका लागि नेताहरु भीमबहादुर रावल, जनार्दन शर्मा, वर्षमान पुन, सुरेन्द्र पाण्डे र कृष्णबहादुर महराले दाबेदारी प्रस्तुत गरेका थिए। तर आकांक्षीको संख्या धेरै भएपछि विवाद सिर्जना हुँदा यो समूहले आज बबरमहलको कार्की पार्टी प्यालेसमा भएको केन्द्रीय कमिटी बैठकको कार्यसूचीमै यो विषयलाई नराखेको हो।

यता केन्द्रीय सदस्य विष्णु रिजालका अनुसार प्रचण्ड-माधव समूहले आजको बैठकमा महासचिव चयनसम्बन्धी विषयलाई कार्यसूचीमै राखिएको थिएन । बैठकले सचिवालय, स्थायी कमिटी र केन्द्रीय कमिटीलगायतको पदपूर्ति गर्ने जिम्मा स्थायी कमिटीलाई दिने निर्णय गरेको रिजालले जानकारी दिए ।