निलम्बित प्रहरी इन्स्पेक्टर शाही ५ लाख धरौटीमा रिहा

ललितपुर । हनीट्रयापिङ गिरोहसँग मिलेर ३० लाख रुपैयाँ असुली प्रकरणमा मुछिएपछि निलम्बनमा परेकी प्रहरी प्रभाग भैंसेपाटी ललितपुरकी इन्स्पेक्टर बिनु शाही ५ लाख धरौटीमा छुटेकी छन् । आपराधिक लाभको मुद्दामा मुछिएकी शाहीलाई ललितपुर जिल्ला अदालतले ५ लाख रुपैयाँ धरौटीमा छाड्ने आदेश दिएको छ ।

ललितपुर जिल्ला अदालतकी न्यायाधीश रीताकुमारी बख्रेलको इजलासले उनलाई सोमबार धरौटीमा छाड्न आदेश दिएको अदालतका सूचना अधिकारी रामसजीवन महतोले जानकारी दिए ।

महतोका अअनुसार प्रहरीको फरार सूचीमा रहेकी शाही आइतबार निवेदन लिएर ललितपुर जिल्ला अदालतमा उपस्थित भएकी थिइन् ।आइतबार बयान नसकिएपछि उनलाई जिल्ला प्रहरी परिसर ललितपुरको थुनामा पठाइएको थियो । सोमबार बयान सकिएपछि उनलाई धरौटीमा छाडिएको हो ।

इन्द्रकुमार राईको जाहेरीले भीमादेवी थापासहित ६ जनाविरुद्ध आपराधिक लाभको मुद्दा दायर भएको थियो । सोही मुद्दामा शाही फरार थिइन् । प्रहरी प्रभाग भैँसेपाटीमा कार्यरत रहेको बेला उनले एक व्यवसायीलाई बलात्कार मुद्दामा फसाइदिने भन्दै हनीट्र्याप समूहसँग मिलेर रकम असुलेको आरोप छ ।

गृहमन्त्री रमेश लेखकको आडमा उनी निलम्बनबाटै जोगिने दाउमा लागेकी थिइन् । तर मन्त्री लेखकले उनलाई जोगाउन सक्ने स्थिति नभएपछि निलम्बनमा परेकी थिइन् । शाही नेपालमै भए पनि उनलाई पक्राउ नगरी छुट दिइएकोमा गृहप्रशासनको आलोचना हुँदैअएको थियो ।