नेकपा विभाजन भएको छैन : प्रदीप ज्ञवाली

काठमाडौं । ओली पक्षीय केन्द्रीय समिति बैठकले नियुक्त गरेका प्रवक्ता प्रदीप ज्ञवालीले नेपाल कम्युनिस्ट पार्टी (नेकपा) विभाजन नभएको बताएका छन् ।

बालुवाटारमा भएको बैठकबारे जानकारी दिँदै नयाँ प्रवक्ता ज्ञवालीले भने, ‘कम्तिमा हाम्रो तर्फबाट पार्टी विभाजन भएको छैन । कमिटीमा जिम्मेवारी हेरफेर भएको मात्रै हो । प्रतिनिधिसभा मात्रै विघटन भएको हो ।’

उनले अघि भने, ‘यो बैठकले कसैलाई कारवाही गरेको छैन । चुनावमा पार्टी एकतावद्ध भएर जाने छ । एकता चुनावले गराउने छ कि भन्ने आशा प्रधानमन्त्रीले व्यक्त गर्नु भएको छ ।’

अर्को पक्ष (पुष्पकलम दाहाल प्रचण्ड–माधवकुमार नेपाल) को बैठक वैध नभएको उनले बताए । पहिलो अध्यक्ष भएकाले ओली र महासचिवसहितको बैठक नै वैध रहेको उनकाे भनाइ छ ।