मन्जु खाँणपथमा सहरी विकास मन्त्री पत्नी, कर्मचारी र ठेकेदारको निवासमै ताँती

काठमाडौं । उपप्रधान तथा सहरी विकास मन्त्री प्रकाशमान सिंहको मन्त्रालयमा मन्त्राणीको हैकम चल्ने गरेको छ । मन्त्रीपत्नी सिर्जना सिंहले सहरी विकास तथा भवन निर्माण विभागका महानिर्देशकदेखि आयोजना प्रमुखहरुलाई ठेक्कादेखि कर्मचारीको सरुवासम्मको सूची थमाउने गरेकी छन् । मन्त्री प्रकाशमान भए पनि मन्त्रालयका ठेक्कादेखि आयोजना प्रमुखसम्मको सरुवामा मन्त्रीपत्नीकै निर्देशनमा काम हुने गरेका छन् । मन्त्री सिंहको सोझोपनले गर्दा मन्त्रालयमा मन्त्रीपत्नी हावी हुँदैआएकी छन् ।

मन्त्रीपत्नीको हैकम चल्ने भएकाले ठेकेदार र कर्मचारीहरुको चाक्सीबारीमै लाइन लाग्ने गरेको छ । भवन बिभागका २० लाखसम्मका परामर्शका कामदेखि ठूला ठेक्कासम्म पनि मन्त्रीपत्नीकै तोकआदेशमा मात्र दिने गरिएको छ । मन्त्रीपत्नीले हुलै ठेकेदारहरुलाई पठाएपछि भवन विभाग र आयोजनाका कर्मचारीहरु पनि आजित छन् । भवन विभागका एक डीईले भन्छन्–‘मन्त्रीपत्नीका ठेकेदार पनि कति हुन् ?’

पार्टीको तर्फबाट सरकारको नेतृत्व गरेका प्रकाशमान सिंहलाई सफल बनाउनभन्दा पनि उनको परिवारभित्रैबाट उनलाई आर्थिक अनियमिततामा मुछ्ने काम हुँदैआएका छन् । ठेक्का र कर्मचारी सरुवामा आर्थिक लाभ लिनेतिर मात्र मन्त्राणीको ध्यान गएको छ । जसले गर्दा पंचायती तानाशाही ब्यवस्थाबिरुद्ध प्रजातन्त्र प्राप्तीको आन्दोलनको नेतृत्व गर्ने सर्वोच्च नेता स्व. गणेशमान सिंहकै इतिहास मेटाउने कार्य भइरहेको टिप्पणी पनि सहरी विकास मन्त्रालयका कर्मचारीले गर्न थालेका छन् ।

पूर्वगृहमन्त्री बालकृष्ण खाँणलाई जसरी उनकी श्रीमती मन्जु खाँणले डुबाइन्, प्रकाशमान सिंहलाई पनि सिर्जना सिंहले त्यही पथमा लगिरहेकी छन् । मन्त्री सिंहको अस्वस्थताका कारण उनलाई धेरै कुरा थाहा नै नदिई ठेकेदारसँग सेटिङ गर्ने काम सिर्जनाले गर्दैआएकी छन् । मन्त्रीपत्नी सिर्जनाले ठेक्कापट्टामा देखाएको अतिरिक्त चासोको बारेमा बालुवाटार र बुढानीलकन्ठमा समेत गुनासो पुगिसकेको छ ।

विगतमा गणेशमानकी छोरी रितासिंह बैद्यलाई बाल संगठनको आजीवन अध्यक्ष बनाएपछि उनलाई बिचौलियाहरुले दुरुपयोग गरी बालमन्दिरको जग्गा कौडीको मूल्यमा लिजमा दिन लगाएपछि प्रहरीको केन्द्रीय अनुसन्धान ब्यूरो(सीआईबी)ले पक्राउ पूर्जी नै जारी गरेको छ ।

रितासिंह बैद्यको कारणले गणेशमानको इतिहासमा धब्बा लगाउने कार्य त भएकै थियो, बुहारी सिर्जनाको कमिसन प्रेमले थप विवादमा पार्ने काम गरेको छ । रितासिंहले दलालहरुको फन्दामा परेर बालमन्दिरको जग्गा लिजमा दिंदा उनलाई जीवनको उत्तराद्र्धमा प्रहरीको कष्टडीमा जानुपर्ने अवस्था आएको थियो । श्रीमतीको हस्तक्षेपले प्रकाशमानलाई पनि भवन विभागका ठेक्कामा विवादमा तान्ने संभावना देखिएको छ ।