रविन्द्र मिश्रको प्रकाशमान सिंहलाई चुनौती : एक्लै–एक्लै फाइट गर्ने ?

काठमाडौं । राष्ट्रिय प्रजातन्त्र पार्टीका बरिष्ठ उपाध्यक्ष रविन्द्र मिश्रले उपप्रधानमन्त्री प्रकाशमान सिंहलाई एक्लै चुनाव लडेको भए हराइदिने दाबी गरेका छन् । उनले सिंहले एक्लै चुनाव नलडी सबै हत्कण्डा अपनाएर अर्काको बुई चढेर थोरै मार्जिनले जितेको आरोप लगाएका छन् ।

बालबालिकाको अनाथाश्रम बालमन्दिरको जग्गा कौडीको मूल्यमा कानुन मिचेर ब्यापारीलाई दिने निर्णय गराउने दिदी रितासिंह बैद्य संलग्न सीआईबीको फाइल अगाडि बढ्न नदिनका लागि प्रकाशमानले दबाब दिएको समाचार आज नयाँपत्रिकाले प्रकाशित गरेको छ । जुन समाचारको अंशसमेत राखेर मिश्रले अबको चुनावमा प्रकाशमानलाई हराएरै छाड्ने उल्लेख गरेका छन् ।

मिश्रले सामाजिक संजाल फेसबुकमा मंगलबार अपराह्न लेखेका छन्–‘एक्लै एक्लै लडेको भए मैले तपाईँ (प्रकाशमान सिंह) लाई दुबै पटक आरामले हराइदिन्थेँ । तर के गर्ने सबै हतकन्डा अपनाएर, अर्काको बुइ चढेर जित्नुभयो । त्यो पनि बल्लबल्ल थोरैथोरै मार्जिनले ।

तर चुनाव जितेर, उपप्रधानमन्त्री भएर के गर्नुहुन्छ ? तपाईँको भन्दा मेरो नाक १०० गुणा बढी ठाडो छ । याद गर्नुभा छ ?

चुनाव जित्दैमा, मन्त्री–प्रधानमन्त्री हुँदैमा इज्जत बढ्ने होइन । इज्जत बढ्न त त्यो अनुरूपको काम हुनुपर्छ, जुन तपाईँमा शून्य छ ।

मेरा लागि दूरदराजका असल शिक्षकको इज्जत तपाईँजस्ता मन्त्री–प्रधानमन्त्रीको भन्दा दशौँ गुणा बढी छ ।

अब तेस्रो पटक, अनाथ बालबालिकाको ‘बाल मन्दिर’ नै ध्वस्त पार्ने आरोप लागेकी दिदीलाई बचाऊ गर्न ‘मुद्दा नै ढिसमिस गर्न खोज्ने’ तपाईँलाई नहराई त कहाँ छोडुँला र !

जुन दिन म तपाईँलाई हराउँछु नि, त्यस दिन बल्ल यो देशको वास्तविक रूपान्तरणको शंखनाद हुनेछ । यसलाई शाब्दिक होइन, प्रतिकात्मक रूपमा बुझ्नुहोला ।