आईजीपीको निर्देशन अवज्ञा, रमानापत्र गयो, घुमुवा रौतहटमै

काठमाडौं । नेपाल प्रहरी प्रधान कार्यालयको उजुरी छानबिन गर्ने ठाउँबाटै विवादित र आर्थिक अनियमितता गरेका दर्जनौं उजुरी परेकाहरुलाई अनुगमन गर्ने भन्दै सादा पोशाकमा खटाउने गरिएका एकपछि अर्को तथ्य आइरहेका छन् ।

सीआईबीमा दबरन्दी भएका हवल्दार रामबिश्वास यादवलाई उजुरी छानबिनका हाकिम एसपी प्रकाश मल्लले पर्सामा खटाएको र उनी यातायात कार्यालय बीरगंजका प्रमुख धर्मेन्द्र कर्णसँग १५ लाख घुस मागेको बिषयमा छानबिनमा छन् । महोत्तरीका घुमुवाका बारेमा थुप्रै उजुरी पर्दा पनि लुकाइएको बिषय पनि आएको छ ।

यसैक्रममा एसपी मल्लले नै रौतहटमा सादा पोशाकमा काज सरुवा गरेका असई मोहम्मद हुसेनका बारेमा फेरि पनि गुनासो आएपछि आईजीपी बसन्तबहादुर कुँवरले रमाना दिन निर्देशन दिए । हुसेनको दरबन्दी कोशी प्रदेशको मोरङमा हो । जिल्ला प्रहरी कार्यालय रौतहटका एसपी दिलीप घिमिरेले आईजीपी कुँवरको निर्देशन अनुसार आइतबार (मंसिर ९)मा रमानापत्र तयार गरी प्रदेश प्रहरी कार्यालय कोशी, जिल्ला प्रहरी कार्यालय मोरङ र मधेश प्रदेश प्रहरी कार्यालयमा पठाए । यी तीन कार्यालयका अतिरिक्त प्रहरी प्रधान कार्यालयको कर्मचारी प्रशासन शाखामा समेत बोधार्थ पठाइएको रमानापत्र स्वयं हुसेनलाई भने ५ दिनसम्म पनि दिइएको छैन । उनी रौतहटमै बिहीिबार बिहानसम्म घुमुवाका रुपमा कार्यरत छन् ।

दरबन्दी रहेको कार्यालय र प्रदेशका अतिरिक्त काजमा कार्यरत रहेको प्रदेश र प्रधान कार्यालयमा बोधार्थ पुगेको पत्र काजफिर्ता गरिएका हुसेनको हातमा नदिई उनलाई पुनः रौतहटमै काजमा राख्ने चलखेल भइरहेको छ । रौतहटका एसपी दिलीप घिमिरेले नै मानवस्रोत विभागका प्रमुख एआईजी भीम ढकाललाई अनुरोध गरी उनको काज रौतहटमै गराउन लागिएको छ । अवकाशको मुखमा रहेका एआईजी ढकाललाई उनले पुनः काज गरिदिन अनुरोध गरेको स्रोत बताउँछ ।

एसपी घिमिरे दबाबमा परेका हुन् कि उनी पनि असई हुसेनबाट लाभान्वित भएर हो, उनले रमाना दिनुभन्दा थमौतीतिर केन्द्रित भएको स्रोत बताउँछ । तुलनात्मक रुपमा आर्थिक अनियमिततमा नपर्ने स्वभावका एसपी घिमिरेलाई उजुरी छानबिनकै एसपी मल्लले दबाब दिएको बताइन्छ ।

हुसेन एक बर्षअघिसम्म दरबन्दीमा नगई बारामा घुमुवा थिए । धेरै गुनासा आएपछि उजुरी छानबिन शाखाले उनलाई १ नम्बर गण नक्सालमा तानिए । गणमा आएपछि एसपी मल्लसँग नेटवर्क मिलाएर उनलाई तराईमा अनुगमनका नाममा सादा पोशाकमा खटाइएको थियो । बारामा कार्यरत रहेकाले तस्करीको संजालका जानकार उनले प्रहरी प्रधान कार्यालयबाटै सादा पोशाकमा खटिएर दररेट असुली गर्नुसम्म गरी खुसी पारेपछि उनको काज तीन महिनाअघि रौतहटमा भएको थियो । एसपी मल्लले नै उनलाई रौतहटमा काजसरुवा गर्नका लागि सिफारिस गरेका थिए ।

दरबन्दी मोरङमा हुँदाहुँदै रौतहटमा काजमा पठाएर मल्लले आईजीपी कुँवरको नीतिको उल्लंघन गरेका थिए । आईजीपी कुँवर सधैं दरबन्दी फिर्ता हुनुपर्ने नीति लागू गर्नुपर्ने पक्षमा रहँदैआएका छन् ।