कक्षा १ को अंग्रेजी पुस्तकमा जोनी जोनी एस पापा… राखेर के तमासा देखाइएको हो ?

प्रकृति अधिकारी

१. आज पाठ्यक्रम विकास केन्द्रले विकास गरेका प्राथमिक तहका पाठ्यक्रम र पाठ्यपुस्तक सरसर्ती हेरेँ । कक्षा ४ र ५ को तुलनात्मक रूपमा कठिन रहेछ । प्राथमिक तहमा विषयगत शिक्षक भन्ने हुँदैन । नेपाली विषय पृष्ठभूमि भएकाले अंग्रेजी, विज्ञान र गणित पनि पढाउनुपर्छ ।

अंग्रेजी वा विज्ञान पृष्ठभूमि भएकाले नेपाली पनि पढाउनुपर्छ । नेपाली, अंग्रेजी, विज्ञान र गणित विषय नपढेकाले पनि ती विषय पढाउनुपर्छ । शिक्षक सेवा आयोगले लिने परीक्षामा उत्तीर्ण हुनु र कक्षाकोठामा अध्यापन गर्नु फरक कुरा हो । कक्षा १, २ र ३ मा एकीकृत पाठ्यक्रम भएकाले ठिकै छ एउटै शिक्षकले अध्यापन गरुन् तर कक्षा ४ र ५ मा त विषयगत शिक्षक चाहिन्छ नै । अहिलेसम्म आवश्यक परेन, अब किन चाहियो भन्ने तर्कसँग सहमत हुन सकिन्न ।

सामुदायिक विद्यालयमा आधार (जग) नै कमजोर भएपछि माथि छाना बलियो वा पक्का हुने कुरै भएन । तसर्थ जग बलियो बनाउनुपर्छ अनि माथि कमजोर भयो भनेर भन्ने नैतिक आधार हामीसँग रहला । जग नै कमजोर भएपछि हामीले एसइईको नतिजा कमजोर भयो भनेर डाको छोडेर रुनुको कुनै अर्थ रहँदैन ।

२. निजी विद्यालयले कक्षा १ भन्दा अगाडि कम्तीमा तीन वर्ष पठनपाठन गर्छ । सामुदायिक विद्यालयमा इसिडीपछि कक्षा १ मा भर्ना गरिन्छ । इसिडीमा खासै अक्षर लेख्न जानेकै हुँदैनन् तर कक्षा १ को अंग्रेजी पाठ्यपुस्तकमा पहिलो पाठमा नै जोनी जोनी एस पापा…राखिएको छ । हे भगवान, के तमासा हो ? नेपाली त्यस्तै छ । अरु त्यस्तै छ । पहिले त विद्यार्थीले अक्षर चिन्नु पर्यो, मजाले लेख्न सक्नुपर्यो, अर्थ बुझ्न सक्नुपर्यो । इसिडीमा खेलाउने हो पढाउने होइन भन्ने गरिन्छ जबकि नपढाउने हो भने कक्षा १ मा उकाल्नु त गलत हुनेछ । किनकि ठूलो खाडल छ । तसर्थ अहिलेकै पाठ्यक्रम रहने हो भने इसिडी र कक्षा १ को बीचमा कुनै पुल आवश्यक पर्ने देखियो ।

पाठ्यक्रम विकास केन्द्रमा निजामतीतर्फका जागिरे विज्ञहरू हुनुहुन्छ । त्यहाँ जोडिनुभएका शिक्षक पनि विज्ञ हुनुहुन्छ । हामी शिक्षण पेसामा संलग्न नभएकालाई यी पाठ्यक्रम र पाठ्यपुस्तक देख्दा असहज लाग्दोरहेछ । मेरो नितान्त व्यक्तिगत बुझाइमात्र हो । म गलत पनि हुन सक्छु तर हामी बाहिरबाट हेर्नेले प्राथमिक तहको जग बलियो बनाउन कक्षा ४ र ५ मा विषयगत शिक्षक त चाहिन्छ भन्ने नै हो । यो भन्दैमा हाल अध्यापन गरिरहनुभएका प्राथमिक तहका शिक्षकलाई अन्डरइस्टिमेट गर्न खोजिएको होइन । कनिकुथी वा घोकेर पढ्ने पढाउने गर्दा गुणस्तर पक्कै बढ्दैन ।