भाटभटेनी प्रकरणले पार्टी बदनाम, एमाले नेताहरु मिडियासँग भागाभाग

काठमाडौं । भाटभटेनीका मालिक मीनबहादुर गुरुङले ‘दान’ दिएको करिब ११ रोपनी जग्गा प्रकरणले सामाजिक संजालमा मात्र होइन, एमालेभित्रै पनि भित्रभित्रै बिरोध भइरहेको छ । तर खुलेर बिरोध गर्दा भीम रावल हुने त्रासले कोही बोल्न नसके पनि बिन्दा पाण्डेले साहसका साथ गुरुङबाट पार्टी कार्यालयका लागि जग्गा ‘दान’ लिनु गलत भएको टिप्पणी सार्वजनिक रुपमा गरेकी छन् ।

एमालेका केन्द्रीय सदस्य, पोलिटब्यूरो सदस्यदेखि पदाधिकारीसम्मले भाटभटेनीका साहु गुरुङले दिएको दानलाई सही हो भन्न सकेका छैनन् । बिशाल भट्टराईले एक एफएम र गोकुल बास्कोटाले एक टेलिभिजनमा दिएको अन्तर्वार्तामा पार्टी कार्यालयका लागि ब्यापारीसँग दान लिने कार्यलाई सही हो भनेर प्रतिरक्षा गर्न सकेको देखिएन । उनीहरु दुवैले घुमाउरो ढंगले पार्टी अध्यक्ष केपी शर्मा ओलीको निर्णयको बचाउ गर्न खोजे । तर भ्रष्टाचारमा दोषी ठहर भएका गुरुङबाट दान लिनु उचित भएको तर्कपूर्ण जवाफ दिन सकेका छैनन् ।

चियापसल, सामाजिक संजालदेखि सडकसम्म एमाले नेताहरुले विवादित ब्यापारीबाट दान लिएको बिषयमा उठेको प्रश्नको जवाफ दिन सकेका छैनन् । जग्गा प्रकरणपछि एमालेका केन्द्रीय सदस्यदेखि पदाधिकारीसम्म मिडियामा बोल्नबाट पन्छिने गरेका छन् । मिडियाकर्मीको फोन नै रिसिभ नगर्ने, रिसिभ गरिहाले अन्तर्वार्ता दिनबाट पन्छिने गरेका छन् । हरेक दिनजसो अन्तर्वार्ता दिन रुचाउने एमाले नेताहरु जग्गा प्रकरणपछि मिडियाबाट टाढिएका छन् ।

सामाजिक संजालमा एमालेको कीर्तिपुरमा बन्न लागेको कार्यालयलाई ‘भाटभटेनी पार्टी कार्यालय’को संज्ञा दिन थालिएको छ ।