मेलम्चीमा भ्रष्टाचार गर्ने पूर्वसचिव ठाकुरसहित ४ जनालाई ८ बर्ष जेल सजाय, १० करोड बिगो

काठमाडौं । मेलम्ची खानेपानी आयोजनामा भएको भ्रष्टाचारमा दोषी ठहर भएका चार जनालाई सजाय सुनाइएको छ । विशेष अदालतले भ्रष्टाचारमा दोषी ठहर भएका पूर्वसचिव गजेन्द्र ठाकुरसहित चार जनालाई सजाय सुनाएको हो ।

पूर्वसचिव  ठाकुरलाई भ्रष्टाचार मुद्दामा आठ बर्ष कैद सजाय तोकिएको छ । ठाकुरबाट १० करोड १० लाख रुपैयाँ बिगो असुलउपर गर्नसमेत विशेषले आदेश दिएको छ । उनले यति नै रकम जरिवाना तिर्नुपर्नेछ । उनी मेलम्ची खानेपानी समितिका तत्कालीन अध्यक्ष हुन् ।

यसैगरी, मेलम्चीका तत्कालीन कार्यकारी निर्देशक सूर्यराज कँडेललाई पनि ठाकुरसरह ८ बर्ष कैद, जरिवाना र बिगो असुलउपर हुने फैसला भएको छ । अर्का प्रतिवादी रामचन्द्र देवकोटालाई कैद ८ बर्ष एक महिना नै भए पनि जरिवाना र बिगो असुलउपरबापत दुई करोड ९५ लाख रुपैयाँभन्दा बढी हुने फैसलामा उल्लेख छ ।

परामर्शदाता शिवकुमार शर्माको हकमा उनलाई विशेषले मतियार मान्दै २ करोड ९५ लाख रुपैयाँ बिगो निर्धारण गरेको छ । आठ वर्ष कैद तोकिए पनि ६५ वर्षभन्दा बढी उमेर भएका कारण ज्येष्ठ नागरिक ऐनअनुसार २५ प्रतिशत कैद घटाई ६ वर्ष मात्र कैद सजाय सुनाइएको छ । तर, बिगो र जरिवानामा भने उल्लिखित रकम नै तोकिएको छ ।

सो मुद्दामा विशेष अदालतका अध्यक्ष टेकनारायण कुँवर, न्यायाधीशहरु तेजनारायणसिंह राई र मुरारीबाबु श्रेष्ठको इजलासले गत भदौ २५ गते अदालतले पूर्व सचिव ठाकुरसहित चार जनालाई दोषी ठहर गरेको थियो । विशेष अदालतले आज सजाय निर्धारण गर्दै जनही ८ वर्ष १ महिना कैद र बिगो बराबर जरिवानाको फैसला सुनाएको हो ।

सोही मुद्दामा पूर्व सचिव भीम उपाध्यायसहित ११ जनाले सफाइसमेत पाएका थिए ।