प्रहरी प्रमुख बिदा गएको मौका छोपी रौतहटबाट तस्करीको लाइन खुल्ला

काठमाडौं ।। जिल्ला प्रहरी कार्यालय रौतहटका प्रहरी उपरीक्षक दिलिप घिमिरे बिदा गएको मौका छोपी तस्करहरूले लाइन पाएका छन् ।

प्राप्त जानकारी अनुसार रौतहटको मठिया नाकाबाट धनराज, मिश्रीलाल र संजय नाम गरेका तस्करहरूलाई चिनी, मल र कपडा तस्करी गरी ल्याउन लाइन दिइएको छ ।

प्रहरी चौकी मठियाका इन्चार्ज प्रहरी सहायक निरीक्षक(असई) प्रमोद यादवमार्फत् डील भएपछि कार्यवाहक प्रहरी प्रमुख प्रहरी नायब उपरीक्षक एलिजा गिरीले तस्करीको लाइन दिएको स्रोतले दाबी गरेको छ ।
तस्करीको लाइन पाएलगत्तै तस्करहरूले सो नाकाबाट मोटरसाइकलमा चिनी, मल र कपडाको गाँठ नेपाल भित्र्याइरहेका छन् ।

प्रसनि यादवले जयनगर, बंकुल, मठिया, मोतीपुर लगायतका नाकाबाट भंसार राजस्व छली गरी तस्करी लाइन चलाउन तस्करहरूसँग समन्वय गरिदिएपछि तस्करहरूले उत्साहका साथ तस्करी गर्न थालेको बताइन्छ ।
त्यस्तै बेलबिछवा, महादेवपट्टी, ब्राह्मपुरी लगायतका नाका पनि यतिखेर तस्करका लागि खुल्ला गरिएको स्थानीयहरूले बताएका छन् ।

यस सन्दर्भमा जिल्ला प्रहरी कार्यालय रौतहटकी निमित्त प्रमुख प्रहरी नायब उपरीक्षक एलिजा गिरीसँग टेलिफोन सम्पर्क गरी बुझ्न खोज्दा उनी सम्पर्कमा आउन चाहिनन् ।