भैंसेपाटीमा बानियाँमाथि खुकुरी प्रहार, २४ घन्टासम्म आक्रमणकारी पक्राउ परेनन्

ललितपुर । प्रहरीको गुण्डा नियन्त्रण अभियानपछि पछिल्ला दिनमा काठमाडौं उपत्यकामा ग्याङफाइट हुन छाडेको थियो । तर ललितपुरको भैंसेपाटीमा शुक्रबार दिउँसो खुकुरी खुँडासहितको जत्थाले मनोज बानियाँमाथि आक्रमण गरेको छ । राजेशबाबा केसीको समूहले मोटरसाइकलमा गएर बानियाँलाई हात र खु्ट्टामा खुकुरी र खुँडा प्रहार गरी फरार भएको थियो ।

आक्रमणमा परेका बानियाँलाई तत्कालै मेडिसिटी अस्पताल नख्खुमा भर्ना गरिएको छ । उनको अवस्था चिन्ताजनक छ ।

राजेश क्षेत्रमा लामो समयदेखि गुण्डागर्दी र ग्याङ फाइटमा संलग्न हुँदैआएका छन् । शुक्रबार दिउँसै खुकुरी र खुँडा सहित गएर आक्रमण गर्नेहरुलाई प्रहरीले २ दिनसम्म पनि पक्राउ गर्नसकेको छैन । आक्रमण गरिएको स्थान प्रहरी प्रभाग बुङ्मतीनजिकै छ ।

जिल्ला प्रहरी परिसर ललितपुरका प्रवक्ता नरेशराज सुवेदीले शुक्रबार दिउँसो भैंसेपाटीमा मनोज बानियाँमाथि खुकुरी र खुँडा प्रहार भएको बताए । खुकुरी र खुँडा प्रहार गर्नेहरु पक्राउ परिनसकेको उनले बताए । सीसीटीभी फुटेजमा दुईवटा मोटरसाइकलमा आएर आक्रमण गरेको देखिएको छ । आक्रमणकारीको नाम प्रवक्ता सुवेदीले खुलाउन चाहेनन् । उनले भने–‘मोटरसाइकलमा गएर आक्रमण गरेको देखिएको छ । पहिचान भइसकेको छैन । मोटरसाइकलको हुलिया हेरेर उनीहरुलाई छिट्टै पक्राउ गर्नेछौं ।’

प्रहरी प्रभाग बुङ्मतीमा १५ बर्षभन्दा बढी समयदेखि कार्यरत प्रहरी सहायक  निरीक्षक(असई तिलक बस्नेतले नै सूचना दिएर आक्रमणकारीहरु फरार भएको स्रोतको दाबी छ । स्रोतका अनुसार राजेशबाबासँग लाभ लिएर उनका गैरकानुनी गतिबिधिमा आँखा चिम्लदैआएका सई बस्नेतकै सूचनाका आधारमा उनीहरु फरार भएका छन् ।

भैंसेपाटी क्षेत्रमा असई बस्नेत अति नै बदनाम भएको गुनासोपछि उनको पटक पटक सरुवा भए पनि उनले शक्तिकेन्द्रमा पहुँच पुर्याएर थमौती हुँदैआएका छन् । उनले ऊर्जामन्त्री शक्तिबहादुर बस्नेतकै भाइभतिजो हुँ भनेर प्रहरीका उच्च अधिकारीलाई भन्दै सरुवा रोक्ने गरेका छन् । केही महिनाअघि उनको सरुवा जाजरकोट भए पनि रमाना लिएर गएनन् ।

बुङ्मतीमा इन्चार्ज हुने हरेक प्रहरी निरीक्षक असई बस्नेतको प्रहरी आचरणबिपरीतका क्रियाकलापबाट अजित छन् । र, सबैले उनलाई सरुवा गर्न तालक कार्यालय ललितपुर परिसर र उपत्यका प्रहरी कार्यालय रानीपोखरीमा भन्ने गर्दछन् । तर उनले हाकिमहरुलाई दबाब दिएर सरुवा रोक्ने गरेका छन् ।