तोकियो नेकपाको स्थायी र केन्द्रीय कमिटी बैठकको मिति, ओलीले छुट्टै प्रतिवेदन पेस गर्ने

काठमाडौं । नेपाल कम्युनिष्ट पार्टी (नेकपा) को स्थायी र केन्द्रीय कमिटीको मिति तोकिएको छ । आज बालुवाटारमा बसेको सचिवालय बैठकले आगामी मंसिर १३ मा सचिवालय बैठक बस्ने निर्णय गर्नुको साथ १८ गते स्थायी समिति र २५ गते केन्द्रीय कमिटीको बैठकको मिति समेत तोकेको हो । 

सचिवालय बैठकले पार्टीको स्थायी समिति र केन्द्रीय समितिबाट ठोस निर्णय गर्ने बाटो खुलेको छ । पार्टीमा प्रम ओलीले राजीनामा दिनुपर्ने पक्षमा बहुमत सचिवालय सदस्य छन् ।

नेकपाको सचिवालयका ५ सदस्यले निर्णय गरी आजको बैठक राखेका थिए । प्रधानमन्त्री केपी शर्मा ओलीले अर्का अध्यक्ष पुष्पकमल दाहाल ‘प्रचण्ड’को राजनीतिक प्रतिवेदन फिर्ता नभएसम्म सचिवालय बैठकमा भाग नलिने अडान राखिरहेका थिए । तर राष्ट्रपति विद्यादेवी भण्डारीसँगको भेटपछि प्रधानमन्त्री केपी शर्मा ओली नेकपाको सचिवालय बैठकमा सहभागी भएका छन् । र, अर्को बैठक १० दिनपछि राख्ने निर्णय गरी सम्पन्न भएको छ । सचिवालय बैठकपछि १० दिनसम्मका लागि नेकपाको विभाजन टरेको छ ।