प्रधानमन्त्री प्रचण्ड र झलनाथ खनालबीच बालुवाटारमा वार्ता, नेकपा एसलाई सरकारमा ल्याउनेबारे छलफल

काठमाडौं । नयाँ सत्ता गठबन्धनका नेताहरु नेकपा (एकीकृत समाजवादी)लाई पनि सरकारमा सहभागी गराउन उक्त पार्टीको नेतृत्वलाई फकाउन तल्लीन छ ।

नेकपा समाजवादी प्रतिपक्षमा बस्दा नेपाली कांग्रेसले अर्को गठबन्धन बनाउने त्रास नेकपा एमाले र माओवादी गठबन्धनलाई छ । त्यहीकारण सोमबार बेलुका प्रधानमन्त्री पुष्पकमल दाहाल ‘प्रचण्ड’ नेकपा समाजवादीका अध्यक्ष माधवकुमार नेपाललाई भेट्न कोटेश्वर पुगेका थिए । मंगलबार एमाले अध्यक्ष केपी ओली पनि कोटेश्वर पुगेर नेपाललाई सरकारमा आउन आग्रह गरेका छन् ।

अध्यक्ष नेपालको निवासमा मात्र होइन, प्रधानमन्त्री प्रचण्ड र नेकपा (एकीकृत समाजवादी)का सम्मानित नेता झलनाथ खनालसँग पनि वार्ता भएको छ । प्रधानमन्त्रीको सरकारी निवास बालुवाटारमा बुधबार बिहान नेता खनालसँग प्रधानमन्त्रीले भेटेका छन् । भेटमा पछिल्लो राजनीतिक घटनाक्रमबीच छलफल भएको बताइएको छ ।

नेकपा समाजवादीले पछिल्लो राजनीतिक घटनाक्रमबारे निर्णय लिन आज पार्टीको बैठक बोलाएको छ ।