प्रधानमन्त्रीले मन्त्रिपरिषद् बैठकमा पनि भने, ‘राजीनामा दिन्न’

काठमाडौैं । प्रधानमन्त्री केपी ओलीले आजको मन्त्रिपरिषद् बैठकमा पनि आफूले राजीनामा नदिने बताएका छन् । पछिल्लो समय नेपाल कम्युनिष्ट पार्टी (नेकपा) को विवाद चर्किरहँदा प्रम ओलीले लगातार दोस्रो दिन राजीनामा नदिने बताएका हुन् ।

आजको मन्त्रिपरिषद् बैठकमा पनि उनले राजीनामा नदिने अडान दोहोर्‍याएको एक मन्त्रीले जानकारी दिए ।  सरकारमाथि चौतर्फी हमला भैरहेको आरोप लगाउँदै ओलीले आफूलाई कसैले काम गर्न नदिएको आरोप समेत लगाएको ती मन्त्रीले बताए । 

मन्त्रीहरुसँग प्रम ओलीले सरकारलाई पार्टीभित्र र बाहिर दुवैतिरबाट हमला भएको र सोचेजति काम गर्न नसकिएको बताएका हुन् । प्रमले आफूलाई घेराबन्दी गरेको काम गर्न नसकेको बताउँदै राजीनामा मागेको तर आफूले नदिने बताएका हुन् । प्रम ओलीले आफ्नो राजीनमा मागिएकाले मुलुक गम्भीर मोडमा पुगेको समेत बताए ।