युक्रेनको खार्किभमा रुसी ड्रोन आक्रमण, ७ जनाको मृत्यु

किभ । पूर्वी युक्रेनको खार्किभ सहरमा रहेको एक पेट्रोलपम्पमा आज शनिबार गरिएको रुसी ड्रोन आक्रमणमा परी तीन बालबालिकासहित सातजनाको मृत्यु भएको क्षेत्रीय गभर्नरले जानकारी दिएका छन् ।

“खार्किभमा कब्जाधारीले गरेको आक्रमणबाट मृत्यु हुनेको संख्या सात पुगेको छ,” ओलेग सिनेगुबोभले टेलिग्रामको सामाजिक सञ्जालमा भने ।

मृतकमध्ये क्रमशः सात र चार वर्ष र ६ महिनाका बालबालिका छन् । खार्किभका मेयर इगोर टेरेखोभले आक्रमणका कारण इन्धन केन्द्रमा विस्फोट हुँदा नजिकैका घरहरूमा क्षति पुगेको बताए ।

घरभित्र रहेका कम्तीमा ५० जनालाई सुरक्षित स्थानमा सारिएको उनले जानकारी दिए ।

“शत्रुको इरान निर्मित ड्रोनले पेट्रोलपम्पमा प्रहार गर्दा विस्फोट भई १४ निजी घर जलेका छन्,” उनले भने ।

खार्किभका क्षेत्रीय अभियोजक ओलेक्सान्डर फिलाचकोभले खार्किभको नेमिश्ल्यान्स्की जिल्लामा तीन ड्रोन प्रहार गरिएको बताए ।

खार्किभ र क्षेत्रीय राजधानीको पूर्वमा रहेको एउटा गाउँमा रातको समयमा भएको आक्रमणपछि आज पनि हमला गरिएको छ ।