सर्लाहीबाट गिट्टी–बालुवाको अवैध निकासी, बरामद ट्याक्टर र पक्राउ परेकालाई छोड्न मोलतोल

सर्लाही । भारतसँग सीमा जोडिएका क्षेत्रबाट नदीजन्य गिट्टी–बालुवाको अवैध उत्खनन् एवं निकासी भइरहेको छ । सरकारले रोक लगाए पनि सीमावर्ती क्षेत्रमा स्थानीय प्रहरी चौकी कार्यालयहरूलाई मिलाएर तस्करहरूले गिट्टी बालुवाको अवैध निकासीलाई तिव्रता दिएका छन् ।

स्थानीय चौकीदेखि जिल्ला प्रहरीका हाकिमसमेतलाई मिलाएर दैनिक रात्रिको समयमा नेपाली एवं भारतीय तस्करहरुले गिट्टी–बालुवाको तस्करी गर्न थालेको गुनासो बढ्दै गएपछि पछिल्लो सोमबार राति र मंगलबार बिहान दुई छुट्टाछुट्टै स्थानबाट बालुवासहितका ट्याक्टर र ट्रेलर एवं दुई जना भारतीय तस्करलाई नियन्त्रणमा लिए पनि उनीहरुलाई छोड्न अहिले मोलतोल भैरहेको विश्वस्त सूत्रबाट जानकारी हुन आएको छ ।

इलाका प्रहरी कार्यालय (ख) बलराका बरिष्ठ प्रहरी नायब निरीक्षक जितेन्द्र चौधरीका अनुसार तस्करले अवैध रुपमा बालुवा लोड गरेर सीमावर्ती क्षेत्रको दशगजामा ट्रेलर छोडेर आउने र उताबाट भारतीय ट्याक्टर आएर ट्रेलर लैजाने गरेको जानकारीमा आएपछि सोमबार राती बलरा नगरपालिका–३ स्थित दशगजा क्षेत्रबाट एउटा ट्रेलर बरामद गरी इलाका प्रहरी कार्यालय गम्हरिया डुमरियामा राखिएको बताए ।

बप्रनानि चौधरीले बरामद गरिएको सो ट्रेलर साहु र नम्बर जानकारी नभएको बताए । हाम्रो स्रोतबाट प्राप्त खबर अनुसार उक्त ट्रेलर बलरा–३ का टुन्नु झाको नाममा रहेको छ भने ट्रेलर नम्बर ना ४ त ५०४४ हो ।

त्यस्तै प्रहरी चौकी सिमरा फेनहरा र प्रहरी चौकी बारा उधोरण क्षेत्रको नदिया पकरी नाकाबाट प्रहरीले भारतीय तस्कर सकूल मियाँ र जकुल मियाँ लाई भारतीय नम्बर ३० एजी ६२४८ नम्बर र ज.१.त ५०७६ नंबरको ट्रेलर इंजिनसहित बरामद गरी मलंगवा लगेर छाड्ने लागेको स्रोतले बताएको छ । स्रोतका अनुसार मोलतोल मिलाउर उनीहरुलाई छाड्न लागिएको छ ।

जिल्ला प्रहरीका घुमुवामार्फत् मासिक प्रतिट्रेलर ५० हजार र स्थानीय चौकीलाई प्रतिटेलर ५ सय रूपैयाँमा लाइन मिलाइएको र नयाँ हाकिम साबले पुरानो रेटलाई दोब्बर गर्नुपर्ने अडान राखेपछि कुरा नमिल्दा ट्याक्टर समातेर लगेको स्रोत बताउँछ ।

आज बरामद ती ट्याक्टर र तस्करलाई छाड्न ५ लाखदेखि मोलतोल हुँदै तीन लाखमा अड्किएको स्रोतले जनाएको छ ।

यस सम्बन्धमा जिल्ला प्रहरी कार्यालय सर्लाहीका प्रमुख एसपीलाई फोन गर्दा सम्पर्क हुन सकेन भने भने सूचना अधिकारी प्रहरी नायब उपरीक्षक दिपेन्द्र पंजियारले फोन नै उठाएनन् ।

गिट्टी बालुवा तस्करी हुुँदै गरेको भिडियो हेर्नुहोस्