कर्णालीमा नेकपाको संकट बढ्दै, केन्द्रबाट कस्तो छ समाधानको प्रयास ?

काठमाडौं । कर्णाली प्रदेशमा नेपाल कम्युनिष्ट पार्टी (नेकपा) विवाद बढ्ने क्रम रोकिएको छैन । 

संसदीय दलका नेता तथा मुख्यमन्त्री महेन्द्रबहादुर शाहीविरुद्ध संसदीय दलमा अविश्वासको प्रस्ताव दर्ता भएसँगै चर्केको विवाद अहिले प्रमुख सचेतक हटाउनेसम्म आइपुग्दा संकटको रुप लिइसकेको छ । 

आइतबार शाहीविरुद्ध तत्कालीन एमालेका १५ र माओवादी केन्द्रका ३ गरी १८ सांसदले  अविश्वासको प्रस्ताव दर्ता गरेका थिए। अविश्वासको प्रस्ताव दर्ता भएसँगै केन्द्रमा समेत यसको तरंग आइपुगेको छ । 

नेकपा अध्यक्ष पुष्पकमल दाहाल प्रचण्डले शाहीविरुद्धको अभियान रोक्नका लागि प्रधानमन्त्री केपी शर्मा ओली र वरिष्ठ नेता माधवकुमार नेपाललाई आग्रह गरिसकेका छन् । उनले अहिलेको विवाद बढ्दा यसको चौतर्फी असर पर्ने भन्दै प्रस्ताव फिर्ता लिनका लागि दबाब दिएका हुन् । सोसँगै विवाद मिलाउने प्रयास सुरु भैसकेको छ । 

नेता नेपालले शाहीलाई सच्चिने मौका दिनुपर्ने भन्दै अविश्वासको प्रस्ताव फिर्ता लिनुपर्ने बताइसकेका छन् । यस्तै प्रम ओली पनि अविश्वासको प्रस्तावको पक्षमा नरहेको नेकपा निकट स्रोत बताउँछ । 

कर्णाली प्रदेशमा नेकपाको ३३ सांसद छन् । १८ जनाले उनीविरुद्ध हस्ताक्षर गरेकाले संसदीय दलमा शाही अल्पमतमा परेका छन्।  संसदीय दलमा अल्पमतमा परेसँगै उनको सरकार पनि ढल्ने सम्भावना छ । तर केही सांसदले मात्र पनि निर्णय परिवर्तन गरेमा यो प्रस्ताव तुहिने बताइन्छ । तर यसरी प्रस्ताव तुहिदा सो प्रदेशको आन्तरिक राजनीतिमा दीर्घकालिन असर पर्ने भएकाले दुबै पक्षलाई विन-विनको अवस्थामा ल्याउने विषयमा छलफल चलेको छ ।