कर्णालीका मुख्यमन्त्रीमाथि आफ्नै दलका सांसदको अविश्वास, दर्ता भयो अविश्वासको प्रस्ताव

काठमाडौं । कर्णाली प्रदेश सरकारविरुद्ध १८ जना सांसदले अविश्वासको प्रस्ताव दर्ता गरेका छन् । सरकारविरुद्ध सत्तारुढ नेपाल कम्युनिष्ट पार्टीकै सांसदले अविश्वासको प्रस्ताव दर्ता गराएका हुन् । 

महेन्द्रबहादुर शाही प्रदेशमा नेकपा संसदीय दलको नेतामा चयन भएपछि संसदीय दलको प्रभावकारिता र सरकारको उपस्थिति फितलो भएको आरोप लागेको छ । 

नेकपा सांसदहरुले नेकपा प्रदेश सभा संसदीय दलको विधान २०७५ को नियम २४ (१) अनुसार अविश्वासको प्रस्ताव दर्ता गरिएको उल्लेख छ । 

उनीहरुले तत्काल विधानको नियम १, २, ३ र ४ अनुसार बैठक राखेर प्रस्तावलाई निर्णयका लागि पेश गर्न माग समेत गरेका छन् । 

यसरी अविश्वासको प्रस्ताव पेश गर्नेमा नेता यमलाल कँडेल, चक्रबहादुर शाही, करवीर शाही, कुर्मराज शाही, अम्मर बहादुर थापा, सुशील कुमार थापालगायत १८ जना रहेका छन् । 

कँडेल कर्णाली प्रदेशको मुख्यमन्त्रीको दाबेदारका रुपमा रहेपनि तत्कालीन एमाले र माओवादी केन्द्रबीच भागबण्डा हुँदा कर्णाली र सुदूरपश्चित माओवादी केन्द्रको भागमा परेपछि उनले मुख्यमन्त्री पाएका थिएनन् ।