राजदूत नियुक्तिबारे असन्तुष्टि जनाउन प्रचण्ड बालुवाटारमा

काठमाडौं । नेपाल कम्युनिष्ट पार्टी (नेकपा) अध्यक्ष पुष्पकमल दाहाल प्रचण्ड बालुवाटार पुगेका छन् । बिहीबार प्रधानमन्त्री तथा नेकपा अध्यक्ष केपी शर्मा ओलीले आफूखुशी राजदूत नियुक्त गरेको विषयमा असन्तुष्टि जनाउन प्रचण्ड बालुवाटार पुगेको स्रोतले बताएको छ ।  

सरकारले हिजो मन्त्रिपरिषद् बैठक मार्फत् मुख्यसचिव तथा राजदूतहरु नियुक्ति गरेको थियो । यो विषयमा पार्टीसँग कुनै सल्लाह नगरेको भन्दै नेकपाका अधिकांश सचिवालय सदस्य असन्तुष्ट रहेको बताइएको छ । यसअघि नेकपा स्थायी समिति बैठकमा सरकारले महत्वपूर्ण निर्णय गर्दा पार्टीमा छलफल गर्ने प्रस्ताव पारित गरेको थियो । प्रम ओलीले कदम सो प्रस्ताव विपरित रहेको भन्दै नेकपामा असन्तुष्टि बढेको छ । 

बिहीबार सरकारले मुख्यसचिवमा शंकरदास बैरागीलाई नियुक्त गरेको थियो भने पूर्व अर्थमन्त्री युवराज खतिवडा र पूर्व मुख्यसचिव लोकदर्शन रेग्मीलाई क्रमश: अमेरिका र बेलायतको राजदूत नियुक्त गरेको छ ।

आजको दुई अध्यक्षबीचको छलफलमा यो विषयमा नै चर्चा हुने खुमरटार स्रोतले बताएको छ । यस्तै ओली र प्रचण्डबीच मन्त्रिमण्डल पुनर्गठनको विषयमा पनि छलफल हुने बताइएको छ । 

मन्त्रिमण्डल पुनर्गठनको विषयमा समेत अझैसम्म कुरा मिल्न सकेको छैन । प्रम ओली हरेक विषयमा एकलौटी बढेको र आफ्नो कुनैपनि प्रस्ताव नमानेको भन्दै प्रचण्डको असन्तुष्टि बढेको बताइएको छ ।