मिलेन ओली-प्रचण्डको कुरा, आजको छलफल निष्कर्षविहीन

काठमाडौं । मन्त्रिमण्डल पुनर्गठनका लागि सत्तारुढ नेपाल कम्युनिष्ट पार्टी (नेकपा) का अध्यक्षद्वय प्रधानमन्त्री एवं नेकपाका अध्यक्ष केपी शर्मा ओली र अर्का कार्यकारी अध्यक्ष पुष्पकमल दाहाल ‘प्रचण्ड’ बीचको छलफल निष्कर्षविहीन भएको छ । 

मंगलबार बालुवाटारमा भएको छलफलमा नेकपाका दुई अध्यक्ष कुरा मिल्न सकेन। यो सँगै मन्त्रिमण्डल पुनर्गठनको मिति पछि धकेलिएको छ । 

प्रधानमन्त्री ओली र अध्यक्ष प्रचण्ड मन्त्रिमण्डल पुनर्गठन, राजनीतिक नियुक्ति तथा पार्टी एकीकरणका बाँकी काम टुंग्याउनेलगायतका विषयमा गत बिहीबारदेखि निरन्तर छलफलमा छन् । तर, मुख्य मानिएको मन्त्रिमण्डल पुनर्गठनको विषयमै दुई अध्यक्षको धारण फरक परेपछि अन्य विषय अगाडि बढ्न सकेका छैनन् ।

६ असोजमा बसेको सचिवालय बैठकले संवैधानिक अङ्गमा नियुक्त हुनयोग्य व्यक्तिहरूको सूचीका लागि रोस्टर बनाउने, १० दिनभित्र एकीकरणको बाँकी काम सम्पन्न गर्न गृहकार्य गर्ने गरी ओली र प्रचण्डलाई जिम्मेवारी दिएको थियो ।

प्रम ओली अहिले केही मन्त्रीलाई यथावत राखेर मन्त्रिमण्डल पुनर्गठन गर्नुपर्ने पक्षमा छन् । तर प्रचण्ड भने यो प्रस्तावसँग सहमत हुन नसकेको बताइएको छ ।