आधिकारिक ट्रेड युनियनको निर्वाचन रोक्ने मन्त्रिपरिषद्को निर्णय

काठमाडौं । निर्वाचनको सम्पूर्ण तयारी पूरा भएपनि निजामती कर्मचारीहरूको आधिकारिक ट्रेड युनियन निर्वाचन स्थगित भएको छ । मंगलबार बिहान बसेको मन्त्रिपरिषद् बैठकले निर्वाचन स्थगित गर्ने निर्णय गरेको हो। 

आगामी असोज २४ गतेका लागि तोकिएको निर्वाचनको लागि निर्वाचन आयोगबाट मतपेटिकासमेत व्यवस्था भैसकेको थियो । तर अन्तिम अवस्थामा चुनाव रोकिएको छ । 

कोरोनाको महामारी फैलिइरहेको अवस्थाका कारण चुनाव रोक्न प्रस्ताव पेश भएको र मन्त्रिपरिषद्ले सो प्रस्ताव पारित गर्दै अर्को निर्णय नहुन्जेलसम्मका लागि चुनाव स्थगित गरेको एक मन्त्रीले बताए । 

कोरोनाको कारण भनिएपनि चुनाव सर्नुको कारण भने सत्तारुढ नेपाल कम्युनिष्ट पार्टी (नेकपा) को आन्तरिक राजनीति रहेको बताइन्छ ।

नेकपाले पार्टी एकीकरण गरेपनि अहिलेसम्म कर्मचारी संगठनको भने एकता हुन सकेको छैन । तत्कालीन नेकपा माओवादी केन्द्र र नेकपा एमाले सम्बद्ध राष्ट्रिय निजामती संगठन र नेपाल निजामती संगठनको एकता प्रक्रिया पूरा हुन सकेको छैन । यस्तोमा चुनाव गरिहाल्नु उपयुक्त नहुने नेकपाको बुझाई रहेको बताइएको छ । 

यो विषयमा आइतबारको सचिवालयको बैठकमा पनि कुरा उठेको थियो । अन्य विभागको एकता बिस्तारै गरेपनि कर्मचारी संगठनको एकता गरिहाल्ने विषयमा बैठकमा छलफल भएको थियो । तर कर्मचारी संगठनको एकताअघि चुनाव गर्न नहुने नेकपाको मत भएकाले पनि निर्वाचन सार्ने तयारी भएको बताइएको छ ।

नेकपाको आज बस्ने सचिवालय बैठकले पनि यो विषयलाई अघि बढाउने तयारी गरेको छ ।