फागुनमै महाधिवेशन सम्भव रहेको रामचन्द्र पौडेलको दावी

काठमाडौं । नेपाली कांग्रेसका वरिष्ठ नेता रामचन्द्र पौडेलले फागुनमै १४ औं महाधिवेशन गर्नुपर्ने बताएका छन्।

पाँच महिनामा महाधिवेशनका लागि तयारी गर्न सकिने उल्लेख गर्दै पौडेलले समयमै महाधिवेशन सम्पन्न गर्नुपर्ने बताएका हुन्।

‘बाँकी रहेको पाँच महिना अवधिलाई सदुपयोग गरी समयमा महाधिवेशन सम्पन्न गरौं भन्ने हो,’ सोमबार विज्ञप्ति निकालेर पौडेलले भनेका छन्, ‘त्यो पनि नगरेर अधिवेशन टार्ने, नगर्ने नियत रहने हो भने पार्टीलाई संकटबाट जोगाउन विशेष महाधिवेशन बोलाएर भने पनि पार्टी बचाउन सकिन्छ भन्ने मेरो आशय हो।’

१३ औं महाधिवेशनकै क्रियाशील सदस्यबाट नयाँ महाधिवेशन गर्न सकिन्छ भन्ने विकल्प प्रस्तुत गरेपछि पौडेलको आलोचना भएको थियो। त्यसबारे प्रष्टाउँदै उनले संकट टार्न विशेष महाधिवेशन गर्न सकिने बताएका हुन्।

पौडेलले महासमिति बैठकमा सुनौलो भविष्यका लागि समयवद्ध काम गर्नुपर्ने लिखित प्रस्ताव नै पेश गरेका थिए।

कांग्रेस सभापति शेरबहादुर देउवा नेतृत्वको कार्यसमितिको चार वर्षे नियमित कार्यकाल गत वर्ष फागुनमा सकिएको हो। देउवाले विधानअनुसार केन्द्रीय समितिबाट निर्णय गरी फागुन १९ सम्मका लागि म्याद थपेका छन्।

नेता पौडेलले भने एक महिनामा सकिने समायोजनका काम पनि वर्षदिनसम्म नसकेर महाधिवेशन टार्न खोजिएको आशंका पनि गरेका छन्।

‘वर्तमान नेतृत्वको नियत हेर्दा अधिबेशननै टारेर पार्टीलाई संकटतिर धकेल्ने कोशिष देखिन्छ। किनभने एकै महिनामा सम्पन्न हुन सक्ने समायोजन कार्य कतिपय जिल्लामा एक वर्ष बितिसक्दा पनि सम्पन्न गराइएको छैन,’ पौडेलले भनेका छन्, ‘समायोजन नै नभएपछि कृयाशील नवीकरण र वितरण त्यसै रोकिएर बस्ने भयो र अधिवेशन नै अन्यौलमा पर्ने स्थिति पैदा भयो।’