आयल निगमका पूर्वकार्यकारी निर्देशक गोपाल खड्का दोषी ठहर, १५ महिना कैद, बिगोसहित १८ करोड जरिवाना

काठमाडौं। विशेष अदालतले नेपाल आयल निगमका पूर्वकार्यकारी निर्देशक गोपालबहादुर खड्कालाई अकुत सम्पत्ति आर्जनको मुद्दामा दोषी ठहर गरेको छ ।

विशेष अदालतका अध्यक्ष श्रीकान्त पौडेल, सदस्यहरू शालिग्राम कोइराला र डा. खुसी प्रसाद थारुको इजलासले आज उनलाई दोषी ठहर गरेको हो ।

गैरकानुनी सम्पत्ति आर्जनको अभियोगमा खड्का दोषी ठहर हुनुका साथ विशेष अदालतले खड्कालाई १ वर्ष ३ महिना कैद तथा बिगोसहित १८ करोडभन्दा बढी जरिवाना हुने फैसला समेत सुनाएको हो ।

अख्तियार दुरुपयोग अनुसन्धान आयोगले २३ पुस २०७८ मा खड्कामाथि १८ करोड ६६ लाख ५ हजार ६२९ रुपैंया गैरकानुनी रुपमा आर्जन गरेको अभियोग लगाएको थियो ।