ललितपुर जिल्ला अदालतकी महिला कर्मचारीलाई कुटपिट गर्ने वकिल पक्राउ

काठमाडौं। ललितपुर जिल्ला अदालतमा कार्यरत एक जना महिला कर्मचारीलाई कुटपिट गरेको आरोपमा कानुन व्यवसायी पक्राउ परेका छन्।

बुधबार अपराह्न साढे ४ बजे जिल्ला अदालतकी नायब सुब्बा प्रेमिका तामाङमाथि हातपात गरेको आरोपमा अधिवक्ता अमिर लामिछाने पक्राउ परेका हुन् । आफूलाई हात पात गरेको भन्दै नासु प्रेमिका तामाङले प्रहरीमा उजुरी दिएकी थिइन्।

मुद्दाको फाइल हेर्नेक्रममा सुरु भएको विवादमा लामिछानेले हातपात गरेको तामाङको दाबी छ। तामाङको मुखमा चोट देखिएको छ।

ललितपुर प्रहरी परिसरले लामिछानेलाई पक्राउ गरेको जनाएको छ ।

‘लामिछानेले तामाङको फाँटमा पुगेर फाइल मागेर हेर्नु भएको रहेछ। तामाङले फोटो कपी गरेर हेर्नुस् भन्दा तँ तँ र मम भन्दै लामिछाने झम्टिएको र हातपात गरेको पीडितले आरोप लगाउनु भएको छ’, ललितपुर प्रहरी परिसर प्रमुख सिद्धिविक्रम शाहले भने।

उनीमाथि अभद्र व्यवहारमा अनुसन्धान भइरहेको प्रहरीले जनाएको छ।