अभिनेता दीपकराज गिरीले भने- राष्ट्रपतिलाई गाली नगर्नुहोस्

काठमाडौँ। अभिनेता तथा फिल्म निर्माता दीपकराज गिरीले राष्ट्रपति रामचन्द्र पौडेललाई गाली नगर्न अनुरोध गरेका छन्।

तत्कालीन राष्ट्रपति विद्यादेवी भण्डारीले संविधान विपरीत ‘होल्ड’ गरेको नागरिकता विधेयक बुधबार वर्तमान राष्ट्रपति रामचन्द्र पौडेलले प्रमाणीकरण गरेपछि अहिले उनको आलोचना र विरोध चर्को भइरहेको छ।

यही विषयमा गिरीले यसमा राष्ट्रपति पौडेलको कुनै दोष नभएको भन्दै गाली नगर्न अनुरोध गरेका हुन्।

राजा फालेर राष्ट्रपति ल्याएको नै प्रधानमन्त्री र संसद्लाई शक्तिशाली बनाउनलाई भएको उल्लेख गर्दै अभिनेता गिरीले नागरिकता विधेयक प्रमाणीकरणका लागि जसले सिफारिस गर्‍यो ऊ नै दोषी भएको दाबी गरेका छन्।

‘राजा फालेर राष्ट्रपति ल्याएको नै प्रधानमन्त्री र सदनलाई पावरफुल बनाउनलाई हो’, गिरीले सामाजिक सञ्जालमार्फत टिप्पणी गरेका छन्, ‘गालीचाहिँ राष्ट्रपतिलाई किन? जसले सिफारिस गरे उनै दोषी हुन्।’

यसअघि तत्कालीन राष्ट्रपति भण्डारीले संसद्‌बाट दुई-दुईपटक पारित गरेर पठाउँदा पनि प्रमाणीकरण नगर्दा राष्ट्रपतिकै कार्यालयमा अड्किएको नागरिकता विधेयक सरकारको सिफारिसमा वर्तमान राष्ट्रपति पाैडेलले बुधबार प्रमाणीकरण गरेका हुन्।