नक्कली भुटानी शरणार्थी प्रकरणमा निष्पक्ष छानबिन हुनुपर्छ : उपेन्द्र यादव

काठमाडौं । जनता समाजवादी पार्टी (जसपा) का अध्यक्ष उपेन्द्र यादवले नक्कली भुटानी शरणार्थी प्रकरणमा पूर्वाग्रहरहित ढंगले अनुसन्धान गर्नुपर्ने बताएका छन् । जनकपुरधाममा पत्रकार सम्मेलन गर्दै जसपा अध्यक्ष यादवले यस्तो बताएका हुन् ।

सरकारमा रहेका जिम्मेवार व्यक्तिले नै नेपाली नागरिकलाई नक्कली भुटानी शरणार्थी बनाएर अमेरिका पठाउने गरेको उल्लेख गर्दै उनले यसबाट नेपालको छवि अन्तर्राष्ट्रिय जगतमा धुमिल भएको बताए ।

अनुसन्धानमा जो दोषी देखिए पनि तिनलाई कानुनी दायरामा ल्याउनुपर्ने भन्दै उनले भने, ‘यो घटनाको निष्पक्ष छानबिन पूरा हुनुपर्छ । छानबिन गरेर जो अभियुक्त देखापर्छ त्यसलाई कानुनको दायरामा ल्याउनुपर्छ । पूर्वाग्रहरहित भएर छानबिन हुनुपर्छ ।’