एमालेले मुख्यमन्त्रीमा अगाडि सारेका देवी ज्ञवाली कांग्रेसका जोशीसँग पराजित

चितवन । नेकपा एमालेले बागमती प्रदेशको मुख्यमन्त्रीको रुपमा अगाडि सारेका देवी ज्ञवाली पराजित भएका छन् । चितवन–२ ‘ख’ प्रदेशसभामा नेपाली कांग्रेसका उम्मेदवार उत्तम जोशीसँग उनी पराजित भएका छन् । सत्तागठबन्धनका तर्फबाट उम्मेदवारी दिएका जोशीले ज्ञवालीलाई ५६२ मतान्तरले पराजीत गरेका छन् । 

जोशीले १३ हजार ३०६ मत ल्याई बिजयी भएका छन् भने ज्ञवालीले १२ हजार ७४४ मत प्राप्त गरी उपबिजेता बनेका छन् । ज्ञवाली २०७४ को स्थानीय तहको निर्वाचनमा भरतपुर महानगरपालिकाको मेयरको उम्मेदवार थिए । मतगणनाका क्रममा मतपत्र च्यातेर ज्ञवालीलाई हराएको आरोप एमाले र उनी स्वयंले लगाएका थिए ।

ज्ञवालीले निर्वाचनअघि नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई हराउँछु भन्दै अन्तर्वार्ता र भाषण गरेका भिडियो अहिले पनि अर्काइभमा सर्च गरी हेर्न सकिन्छ । प्रचण्ड चितवन ३ मा उम्मेदवार भएमा हराउने दाबी उनले गएको असोजमा गरेका थिए । 

भरतपुरको मेयरमा उम्मेदवार भएदेखि नै चर्चामा रहेका ज्ञवालीलाई चितवनबासीले प्रदेशमा समेत पत्याएनन् । चितवन २ को प्रतिनिधिसभामा रवि लामिछानेले सबैभन्दा बढी मतान्तरमा जित्दा चर्चित पात्र ज्ञवाली भने पराजीत भएका छन् । उनको पराजयको समाचार रवि लामिछानेको बिजयका कारण ओझेलमा परेको छ ।