एमालेले राजावादीलाई काँधमा राखेर हिंडेकोमा दुःख लागेको छः कृष्ण सिटौला

 झापा, हल्दिबारी । नेपाली कांग्रेसका नेता तथा प्रतिनिधिसभा सदस्य झापा–३ का उम्मेदवार कृष्णप्रसाद सिटौलाले लोकतन्त्रको रक्षा र प्रेस स्वतन्त्रताका लागि यो निर्वाचनमा पत्रकारहरुले आफूलाई सहयोग गर्नुपर्ने बताएका छन् ।
आज झापाको भद्रपुरमा आयोजित पत्रकार भेटघाट कार्यक्रममा नेता सिटौलाले यस निर्वाचनपछि देशमा दिगो बिकास र शान्ति कायम हुने हुँदा सवै लोकतन्त्रवादी मिलेर सयौंको बलिदानबाट प्राप्त गणतन्त्रलाई रक्षा गर्न लाग्नुपर्ने बताएका छन् ।

पत्रकारहरुले सोधेको प्रश्नको जवाफ दिंदै उनले यस क्षेत्रमा लोकतन्त्रवादी र राजावादीका बीच चुनाव हुने हुँदा विश्वको ध्यान समेत यहाँ रहेको र आफूलाई गणतन्त्र र लोकतन्त्रको हिमायती भन्ने एमालेले राजसंस्थाको वकालत गर्ने राप्रपाका अध्यक्ष राजेन्द्र लिङ्देनलाई बोकेर हिंडेकोप्रति दुःख लागेको बताएका छन् ।

पत्रकारहरुको जवाफ दिदै उनले संघीय लोकतान्त्रिक गणतन्त्रको संस्थागत बिकास ५ बर्षमा गर्न सकेनौं, संविधानले जे जति अधिकार सबै क्षेत्रका जनतालाई दिएको छ, त्यो अनुसार सरकारले काम गर्न नसकेको उनले बताएका छन् । जनताले अपेक्षा गरे अनुसार शिक्षा, स्वास्थ्य ऐन आउन नसक्नु किसान, श्रमिकहरुका लागि विशेष ऐन आउन नसक्नु सरकारको कमजोरी रहेको उनको भनाइ थियो ।

शान्ति प्रक्रिया, संविधान निर्माण, २०४६ देखिका सवै आन्दोनमा महत्वपूर्ण भूमिका खेल्दाखेल्दै आफूले राजावादीसँग चुनाव हार्नुपरेको तितो सत्य समेत पत्रकारसामु ब्यक्त गरे । परिवर्तनको लडाइमा संँगसंँगै हिडेका एमालेले आफूलाई हराउन राजावादीलाई काँधमा राखेर हिंडेकोप्रति उनले दुःख ब्यक्त गरे । 

लोकतन्त्रमाथिको प्रहार, प्रेस स्वतन्त्रतामाथिको प्रहारलाई रोक्न संचारकर्मीहरुको महत्वपूर्ण भुमिका हुने हुँदा सही सूचना विश्लेषण गरी राजावादीहरुको मुकुण्डो जनतासामु ल्याउनुपर्ने उनको जोड थियो । उनले लिङ्देनप्रति इंगित गर्दै भने– एमालेको साथ लिएर निर्वाचित भएका सांसदका कारण बिकास निर्माण र राष्ट्रिय योजना शून्य भएको यो क्षेत्रको बिकासका लागि समेत आफूलाई सबै गणतन्त्रवादीहरुले मतदान गर्नेमा आफू विश्वस्त रहेको बताएका छन् ।