उपेन्द्रले धपाएपछि बाबुरामको नयाँ जुक्ति, वाम एकताका लागि पुगे प्रचण्डको दैलोमा

काठमाडौं। जनता समाजवादी पार्टी (जसपा) अध्यक्ष उपेन्द्र यादवले पार्टीबाट कारवाही गरेपछि राजनितिक जिवन नै अलमलमा परेका पुर्व माओवादी नेता डा.बाबुराम भट्टराई माओवादी केन्द्रका अध्यक्ष पुष्पकमल दाहाल (प्रचण्ड) को दैलोमा पुगेका छन् ।

आफु लगायत ९ जना सदस्यहरु लिएर प्रचण्डसंग बार्गेनिङ्क गर्न पुगेका डा.भट्टराईले वाम शक्तिहरुसंग मिलेर ‘समाजवादी केन्द’ बनाउने प्रस्ताव समेत गरेका छन् ।

केही दिन अघि वामपन्थी दलहरूका शीर्ष नेताहरुबीचको छलफलपछि विचार मिल्नेसँग एकता गरिने प्रचण्डले बताएका थिए । 

योसँगै डा.भट्टराईले बिहीबार प्रचण्डलाई ललितपुरमा भेटवार्ता गरेका थिए । भेटमा उनले वाम पार्टीहरु मिलेर ‘समाजवादी केन्द्र’ बनाउन  प्रस्ताव राखेका थिए । 

प्रचण्डसंगको भेटपछि डा.भट्टराईले आफुले प्रस्ताव गरेको पार्टी कस्तो हुनुपर्ने भनेर एक बिचार ट्विटर मार्फत सार्वजनिक गरेका छन् । ट्विटरमा उनले एक निजि पत्रिकामा आफुले दिएको बिचारबारे उल्लेख गरेका । 

भट्टराईले नयाँ वैकल्पिक शक्ति निर्माणका ३ वटा बाटो देखाएका छन् । जसमा पुरानै पार्टीहरूको रूपान्तरण, विभिन्न पार्टीहरूबाट विचार मिल्नेहरूको ध्रुवीकरण र शून्यबाट नयाँको जन्म भन्ने बाटो उल्लेख छ ।

‘२ चैत २०७० को नेपाल साप्ताहिकको लेखमा मैले नयाँ वैकल्पिक शक्ति निर्माणका २ वा ३ बाटा बताएको थिए’, डा.भट्टराईले लेखेका छन– ‘एक, पुरानै पार्टीहरूको रूपान्तरण, दुई विभिन्न पार्टीहरूबाट विचार मिल्नेहरूको धु्रवीकरण, तीन शून्यबाट नयाँको जन्म, अहिलेको समाजवादी केन्द्रको चर्चा पहिलो र दोस्रोको मिश्रण हो ।’

चिनियाँ कम्युनिष्ट पार्टी (सीपीसी) का विदेश विभाग प्रमुख लिउ जियानचाओ नेपाल आएसँगै वामपन्थी दलहरु एक हुने प्रयासमा छन् । यसको नेतृत्व प्रचण्डले गर्दै पुनः वाम शक्तिकेन्द्र निर्माण तर्फ उद्धत भएको पाईएको छ । 

मंसिरमा हुने प्रतिनिधिसभा र प्रदेशसभाको निर्वाचनलाई लक्षित गर्दै नेताहरु एकता, सहकार्य वा गठबन्धनको लागि दौडधुप गरिरहेका छन् ।