आज सर्वदलीय बैठक बस्दै, एमाले सहभागी नहुने

काठमाडौं । प्रधानमन्त्री शेरबहादुर देउवाले बोलाएको सर्वदलीय बैठक आज अपरान्ह ४ बजे बस्दैछ । 

प्रधानमन्त्री देउवाको सचिवालयका अनुसार उनले संसदमा जारी अवरोध र एमसीसीबारे छलफल गर्न सर्वदलीय बैठक बोलाएका हुन् । तर प्रमुख प्रतिपक्षी दल नेकपा एमालेले भने सर्वदलीय बैठकमा सहभागी नहुने बताएको छ ।

एमालेका प्रमुख सचेतक विशाल भट्टराईका अनुसार बैठकमा माधवकुमार नेपाल नेतृत्वको नेकपा एकीकृत समाजवादीलाई बोलाएकाले आफूहरू सहभागी नहुने भएका हुन्। 

एमाले बाहेकका संसदमा प्रतिनिधित्व गर्ने दलका शीर्ष नेताहरु भने सर्वदलीय बैठका सहभागी हुनेछन् ।

यसअघि शुक्रबार नेकपा माओवादी केन्द्रका अध्यक्ष पुष्पकमल दाहाल प्रचण्डसँग भेट गरेसँगै सर्वदलीय बैठक बोलाउने निर्णय गरेका थिए ।