एमसीसीबारे निर्णय गर्न नेकपा सचिवालय बैठक बस्दै

काठमाडौं । लामो समयदेखि वहसको बिषय बन्दै आएको अमेरिकी परियोजना मिलेनियम च्यालेन्ज कर्पोरेसन(एमसीसी बारे निर्णय गर्न सत्तारूढ नेपाल कम्युनिष्ट पार्टीको सचिवालय बैठक आइतबार बोलाइएको छ । आइतबार अपहराह्न प्रधानमन्त्रीको सरकारी निवास बालुवाटारमा बोलाइएको बैठकको मुख्य एजेन्डा एमसीसी नै हुने बताइएको छ ।

लामो समयदेखि नेकपाका नेताहरु एमसीसी पारित गर्न हुने र नहुनेमा विभाजित छन् । एकथरी एमसीसी पास भएमा अमेरिकी सेना नेपालमा आइहाल्छ भन्ने अतिवादी कुरा गरिरहेका छन् भने अर्कोथरी नेताहरुले एमसीसी पारित नगरे अमेरिका रिसाउँछ, पास गर्नुपर्छ भन्दैआएका छन् ।

नेकपाका बरिष्ठ नेता झलनाथ खनाल र स्थायी समिति सदस्य भीमबहादुर रावल एमसीसी पारित गर्नै नहुने पक्षमा देखिएका छन् । खनालको संयोजकत्वमा एमसीसी पारित गर्ने कि नगर्ने भन्ने बिषयमा गठित रावल र परराष्ट्र मन्त्री प्रदीप ज्ञवाली सदस्य रहेको समितिले प्रतिवेदन दिइसकेको छ । प्रतिवेदनमा खनाल र रावलले पास गर्नै नहुने राय दिएका छन् भने ज्ञवालीले त्यसमा पास गर्नुपर्ने आसयको फरक मत सहित राय दिएका छन् । नेकपाभित्र प्रधानमन्त्री ओली पक्ष र सरकारमा रहेका माधव नेपाल पक्षका मन्त्रीहरु पनि एमसीसी पास गर्नुपर्ने पक्षमा छन् ।

यसअघि जेठ १७ गते एमसीसीका बारेमा निर्णय गर्न नेकपा सचिवालय बैठक बसेको थियो । त्यो बैठकले पनि कुनै निष्कर्ष दिन सकेन । पछिल्लो समय एमसीसीमा रहेका प्रावधान संंशोधन पारित गर्नु नहुने पक्षमा नेकपाका कार्यकारी अध्यक्ष पुष्पकमल दाहाल ‘प्रचण्ड’ समेत पुगेको समाचार पनि सार्वजनिक भएको परिप्रेक्ष्यमा नेकपा सचिवालय बैठक बस्दैछ ।