गिरीको घरमा कालोझण्डा गाडियो, पार्टी निर्देशनपछि पनि संशोधन प्रस्ताव फिर्ता नलिने गिरीको अडान

काठमाडौं, २८ जेठ । सरकारले लिम्पियाधुरा, लिपुलेक र कालापानी समेटिएको नेपालको नयाँ नक्सा समेटेर निशान छाप संशोधन गर्न पेश गरेको संविधान संशोधन विधेयक खारेज गर्न माग गर्दै संसदमा अर्को संशोधन प्रस्ताव दर्ता गराएकी जनता समाजवादी पार्टीकी सांसद सरिता गिरीको विशालनगरस्थित घरमा कालोझण्डा राखिएको छ ।

महानगरीय प्रहरी परिसरले उनको घरमा राखिएको कालोझण्डा हटाएको छ । तर उनको घरमा कालोझण्डा राख्नेको पहिचान हुन नसकेको प्रहरीले बताएको छ । कालोझण्डा राखिएपछि गिरीले सुरक्षा खतरा बढेको भन्दै फण्डा मच्चाउन थालेकी छन् । उनको घरमा युवाहरुले नाराबाजी गर्दै गरेको भिडियो सामाजिक संजालमा सार्वजनिक भएको छ ।

यसअघि पार्टीको सहमतिविना उनले संविधान संशोधन प्रस्ताव दर्ता गरेकाले पार्टीले फिर्ता लिन निर्देशन दिएको छ । स्रोत र प्रमाण नपुगेको भन्दै उनले व्यक्तिगत रुपमा प्रस्ताव खारेज गर्न माग गरेकी छन् । सोही विषयलाई लिएर पार्टीले समेत संशोधन प्रस्ताव फिर्ता नलिए कारबाही गर्ने चेतावनी दिइसकेको छ । मंगलबार पार्टीले उनलाई संशोधन प्रस्ताव फिर्ता लिन निर्देशन दिइसकेको छ । र, फिर्ता नलिए पार्टीले कारबाही गर्ने चेतावनी पनि दिएको छ । गिरीले भने पाटीको निर्देशनपछि पनि संविधान संशोधन प्रस्ताव फिर्ता नलिने बताएकी छन् । 

बुधबार पार्टीका प्रमुख सचेतक उमाशंकर अरगरियाले विज्ञप्ति जारी गर्दै गिरीलाई संशोधन प्रस्ताव फिर्ता लिन निर्देशन दिएका हुन् ।

नेकपा निकट युवासंघले गिरीलाई लिम्पियाधुरासहितको भुभाग समेटिएको नेपालको नक्साका बिरुद्ध भारतीय इशारामा संविधान संशोधन ल्याएकोमा फिर्ता लिन उनलाई चेतावनी दिएको थियो ।