भ्रष्टाचारमा लिप्त राज्यमन्त्री यादवलाई पदबाट बर्खास्त गर्न नेकपाको माग

कृषि राज्यमन्त्री यादव र उनलाई भ्रष्टाचार गरेको आरोप लगाउँदै प्रभु साहले लेखेको टिप्पणी ।

काठमाडौं । नेपाल कम्युनिष्ट पार्टी (नेकपा) ले प्रदेश २ का भूमि व्यवस्था, कृषि तथा सहकारी राज्यमन्त्री योगेन्द्र यादवलाई पदबाट बर्खास्त गर्न माग गरेको छ ।

आर्थिक अनियमिततामा संलग्न भएको आरोपप्रति जिम्मेवार हुनुको सट्टा आपराधिक रुपमा प्रस्तुत भएको भन्दै नेकपाले राज्यमन्त्री यादवको राजीनामा माग गरेको हो ।

शुक्रवार नेकपा प्रदेश २ का अध्यक्ष प्रभु साहले सामाजिक संजालमार्फत् प्रदेश सरकार लकडाउनमा पनि भ्रष्टाचारमा व्यस्त रहेको आरोप लगाएका थिए । शनिवार राज्यमन्त्री यादवले प्रेस विज्ञप्तिमार्फत् अध्यक्ष साहलाई गालीगलौज गरी झुटा आरोप लगाएपछि नेकपाले उनलाई पदबाट हटाउन मुख्यमन्त्री लालबाबु राउतसँग माग गरेको हो ।

अध्यक्ष साहका स्वकीय सचिव विजय यादवद्वारा जारी वक्तव्यमा राज्यमन्त्री यादवको राजीनामा माग गर्नुको साथै मानहानी तथा साइबर क्राइमको मुद्दा चलाउन समेत ध्यानाकर्षण गराइएको छ ।

‘राज्यमन्त्री योगेन्द्र यादवले आज निकालेको प्रेस वक्तव्यको सम्बन्धमा मेरो गम्भीर ध्यानाकर्षण भएको छ । नेकपा प्रदेश २ को अध्यक्ष प्रभु साहले हिजो सामाजिक सन्जाल मार्फत् प्रदेश–२ सरकारको कृषि मन्त्रालय अन्तर्गत व्यापक अनिमियता भइरहेको बिषय उठाउनु भएको थियो । यस सम्बन्धमा सरकारको आधिकारिक धारणा आउनुपर्नेमा आज राज्यमन्त्रीले साहमाथि हत्यारादेखि भ्रष्टाचारीसम्मको तथानाम गालीगलौज गरी आफ्नो असली चरित्र छरलङ्ग पारेका छन्’ वक्तव्यमा उल्लेख छ, ‘प्रदेश २ का प्रमुख प्रतिपक्ष दलको प्रदेश अध्यक्षको हैसियतमा त्यहाँ भइरहेको गलत क्रियाकलापबारे प्रश्न उठाउँदा त्यसको जवाफ दिनु र सुधार गर्नुको सट्टा यसरी मानहानी एवं साइबर क्राइममै उत्रिनु दुर्भाग्य हो । यस्ता अपराधीलाई प्रदेश २ सरकारले तुरुन्त मन्त्री पदबाट हटाउन र कानुनी छानबिनमा सहयोग गर्न जरूरी छ ।’

अध्यक्ष साहले प्रदेशको कृषि मन्त्रालयको संलग्नतामै रौतहट लगायत प्रदेशभरीको कृषि ज्ञान केन्द्रमार्फत् आर्थिक अनियमितता भइरहेको भन्दै छानबिन गर्न ध्यानाकर्षण गराएका थिए ।