दिल्लीलाई सुझाव दिंदा सरिता गिरीको टाउको किन दुख्छ ?

बिष्णु रिजाल र सरिता गिरी

काठमाडौं । भारतले अतिक्रमण गरेको भूभाग लिम्पियाधुरा, लिपुलेक र कालापानीको नक्सा नेपालको सार्वभौम संसदबाट अनुमोदन गर्न लाग्दा भारतीयलाई भन्दा बढी टाउको दुखाई नेपालका केही नेतालाई भइरहेको छ । डा. बाबुराम भट्टराई, विमलेन्द्र निधि, प्रदीप गिरीहरुले नेपाली भूभाग समेटेर नक्सा जारी गर्दा खुसी हुनुपर्नेमा दुःखी भएका छन् । सरिता गिरी त अति तल्लो स्तरमा आफ्नो मातृभूमि फिर्ता गर्ने कार्यको बिरोधमा उत्रिएकी छन् । र, अझ अगाडि बढेर नेपालमा भारतले लगाएको नाकाबन्दी सही थियो भन्न पछि परेकी छैनन् । मधेशी जनतालाई साथ दिनका लागि त्यतिबेला भारतीय हस्तक्षेप सही थियो भन्न थालेकी छन् ।

नेपाल कम्युनिष्ट पार्टीका केन्द्रीय सदस्य तथा विदेश विभागका उपप्रमुख विष्णु रिजालले आइतबार सामाजिक संजालमा लेखेको टिप्पणीमा जवाफ दिने क्रममा सरिता गिरी तल्लो स्तरमा उत्रिएकी हुन् । रिजाललले बल दिल्लीको कोर्टमा छ भनेर सामाजिक संजालमा लेखेका छन्–‘नेपालमा भारतलाई सबभन्दा बढी ‘बुझेको’ र ‘झेलेको’ नेता नै केपी ओली हुनुहुन्छ भन्ने तथ्य भारतीयहरुले बुझ्नुपर्ने हो । भारतसँग हार्दिक र उन्नत सम्बन्धका लागि बेलाबेलामा जोखिम मोल्नुभएका ओली भारतीयहरुले भनेझैँ एकाएक ‘एन्टागोनिस्ट’ हुनुको कारण उनीहरु आफैँले खोज्नु उपयुक्त हुन्छ । आफ्नो देशका विरुद्ध नाकाबन्दी लगाइँदा कुन चाहिँ प्रधानमन्त्रीले ‘रोटी–बेटीको सम्बन्ध’ को राग अलापिरहन सक्ला र ? आफ्नो देशको भूभाग चुँडालेर लैजाँदा कुन प्रधानमन्त्रीले भलादमी बनेर मीठो कुरा गरिरहन सक्ला र ?

रिजालले सुहासिनी हैदरको अंग्रेजी भाषामा लेखिएको लेख सेयर गर्दै माथिको टिप्पणी लेखेपछि त्यसमा सरिता गिरीले लगातार टिप्पणी गरेकी छन् । उनले सुहासिनी हैदरको लेख पढेको तर नेपालको नक्साका बारेमा प्रश्न रहेको उल्लेख गरेकी छन् । दोस्रोमा उनले १८१६ को सन्धि अनुसार नेपालको नक्सा परिवर्तन गर्ने काम अगाडि बढाउनुभएको छ भनेर प्रश्न गरेकी छन् । तेस्रो टिप्पणी उनको नेपालीका रौं रौंमा आक्रोस पैदा गर्ने खालको छ । उनले नाकाबन्दीमा भारतले गरेको हस्तक्षेप सही छ भन्ने तर्क राखेकी छन् । जसको जवाफमा रिजालले चेतावनीको भाषामा लेखका छन्–‘सरिताजी, नेपालका पक्षमा कुनै कुरा हुँदा तपाईंको टाउको यसरी किन दुख्छ ? नेपाली नागरिकता छ, नेपालको संसदमा हुनुहुन्छ । यसरी नेपालकै विरुद्ध उभिन अलिकति पनि अप्ठेरो लाग्दैन ? मेरो आग्रह छ, यो नेपालको मामिला हो, कृपया यसरी नबोलिदिनूस् । तपाईंलाई कुनै कुरा पनि भन्न मन थिएन, मेरै वालमा आएर टिप्पणी गर्नुभएकाले मात्र लेखेको हुँ ।’